Crime: वाशी परिसरात घरफोडी करून तब्बल ११ लाख रुपये किमतीच्या दागिन्यांची चोरी करणाऱ्या कुख्यात शिकलगार टोळीतील एका आरोपीला वाशी पोलिसांनी अटक केली आहे. ससपाल सिंग ऊर्फ पापा तारासिंग कलानी (वय ३३) असे या आरोपीचे नाव त्याने व त्याच्या इतर तीन साथीदारांनी घरफोड्या केल्याचे निष्पन्न झाले आहे.

या गुह्यातील सर्व आरोपी शिकलगार टोळीतील सदस्य असून त्यांनी २०१५ मध्ये वाशीमध्ये घरफोडी करताना एका महिलेच्या डोक्यात रॉड घालून तिची हत्या केल्याचे तपासात उघडकीस आले आहे. या गुह्यातील इतर तीन आरोपींचा शोध सुरु केल्याची माहिती पोलिसांनी शुक्रवारी दिली. शिकलगार टोळीने काही दिवसांपूर्वी वाशीत राहणारे अश्विनी प्रसाद यांच्या बंद घराचा कडी कोयंडा तोडून त्यांच्या घरातील सुमारे ११ लाख रुपये किमतीचे सोन्या चांदीचे दागिने लंपास केले होते.

याबाबत वाशी पोलिस ठाण्यात गुन्हा दाखल झाल्यानंतर वरिष्ठ पोलिस निरीक्षक शशिकांत चांदेकर यांनी या गुह्याचा तपास करण्यासाठी सहायक पोलिस निरीक्षक पवन नांद्रे, सत्यवान बिले यांचे एक पथक तयार केले होते.

पोलिसांच्या पथकाने अत्यंत बारकाईने घटनास्थळावरील तसेच आरोपी पळून गेलेल्या मार्गातील सुमारे ४०० सीसीटीव्ही फुटेजची तपासणी करून आरोपी राहत असलेल्या परिसराची माहिती मिळवली. आरोपी हे ठाण्यातील शिवाई नगर परिसरात राहत असल्याची माहिती मिळाल्यानंतर पोलिसांच्या पथकाने वेषांतर करत परिसरात दोन दिवस सापळा रचत आरोपी ससपाल सिंगला ताब्यात घेतले.