Mumbai Crime News| अज्ञात चोरटयानी नवी मुंबई पोलीस दलातील एका महिला पोलिसाचे घर फोडून त्यांच्या घरातील तब्बल सव्वा चार लाख रुपये किंमतीचे दागिने चोरुन नेल्याचे उघडकीस आले आहे. एनआरआय पोलिसांनी या प्रकरणात अज्ञात चोरटयाविरोधात घरफोडीचा गुन्हा दाखल करुन तपासाला सुरुवात केली आहे.

या प्रकरणातील तक्रारदार महिला पोलीस नवी मुंबई पोलीस दलात असून त्या उलवे परिसरात कुटुंबासह राहण्यास आहेत. गत 15 जानेवारी रोजी नातेवाईकाचा वाढदिवस असल्याने महिला पोलीस त्यादिवशी दागिने घालुन वाशी येथे कार्यक्रमासाठी गेल्या होत्या. कार्यक्रमावरुन घरी परतल्यानंतर त्यांनी आपले सर्व दागिने घरातील लोखंडी कपाटात काढून ठेवले होते.

त्यानंतर 3 फेब्रुवारी रोजी मुलाच्या शाळेत कार्यक्रम असल्याने या महिला पोलिसाने आपल्या घरात कपाटात ठेवलेला सोन्याचा हार व कर्णफुले घालण्यासाठी पाहिले असता, ते त्यांच्या निदर्शनास आले नाहीत. त्यानंतर या महिला पोलिसाने व त्यांच्या पतीने संपुर्ण घरामध्ये दागिन्यांचा शोध घेतला. मात्र त्यांना दागिने सापडले नाहीत. त्यानंतर कुणीतरी चोरटयाने त्यांच्या घरातील सुमारे सव्वा चार लाख रुपये किंमतीचे दागिने चोरुन नेल्याची खात्री पटल्यानंतर त्यांनी गत गुरुवारी एनआरआय पोलीस ठाण्यात तक्रार दाखल केली.