Navi Mumbai: दुचाकीला कट मारल्याच्या कारणावरून दोघा दुचाकीस्वारांनी ‘एनएमएमटी’ बसच्या चालक व वाहकाला मारहाण केल्याची घटना घणसोलीतील टेम्पटेशन चौकात घडली. विक्की अशोक जाधव व निखिल बाळासाहेब धुमाळ अशी आरोपींची नावे असून रबाळे पोलिसांनी या दोघांविरोधात गुन्हा दाखल करून त्यांचा शोध सुरू केला आहे. या मारहाणीत नवी मुंबई महापालिका परिवहन सेवेतील वाहक अमोल जाधव (वय ३४); तर चालक सत्यवान खैरे (वय २९) हे जखमी झाले आहेत. हे दोघे कर्मचारी रविवारी (ता.१) घणसोली ते वाशी रेल्वे स्थानक या ९ नंबरच्या मार्गावरील बसवर कार्यरत होते.

सकाळी आठ वाजण्याच्या सुमारास त्यांची बस घणसोली डी-मार्ट, घरोंदा येथून वाशीच्या दिशेने जात असताना टेम्पटेशन चौकात आली असताना दुचाकीवरून आलेल्या विक्की जाधव व निखिल धुमाळ या दोघांनी बस थांबवत बसमध्ये जात त्यांच्या दुचाकीला कट मारल्याच्या कारणावरून चालक सत्यवान खैरे याला शिवीगाळ करत बसमधून खाली उतरवले. त्यानंतर त्या दोघांनी बसचालक खैरे व वाहक जाधव यांना ठोशा-बुक्क्यांनी मारहाण केली. त्यानंतर त्यांनी घटनास्थळावरून पळ काढला.