Navi Mumbai News: नवी मुंबई महापालिकेच्या क्षेत्रातील ४ अनधिकृत शाळांना १५ कोटी ५४ लाख १० हजार रुपयांचा दंड आकारण्यात आल्याची माहिती नवी मुंबई महापालिकेचे उपायुक्त दत्तात्रेय घनवट यांनी दिली.

महापालिकेच्या क्षेत्रातील अनधिकृत शाळा बंद होत नसल्यामुळे त्यांच्या संचालकांवर फौजदारी गुन्हे नोंद करण्यासाठी पोलिस ठाण्यात तक्रार करावी, असे आदेश महापालिकेचे आयुक्त राजेश नार्वेकर यांनी शिक्षणाधिकारी अरुणा यादव यांना दिले आहेत. महापालिकेच्या क्षेत्रात वर्ष २००० पासून अद्याप सुमारे ३५ अनधिकृत शाळा होत्या. या अनधिकृत शाळांना शिक्षण विभागाकडून शाळा बंद करण्याच्या वारंवार नोटिसा बजावण्यात आल्या आहेत.

या नोटिसांना दाद न दिल्यास त्यांच्यावर दंडात्मक कारवाई करण्याच्या नोटिसाही बजावण्यात आल्या आहेत. यामध्ये आर्टिस्ट व्हिलेज सी.बी.डी. सेक्टर-८ बी येथील अल मोमिना शाळेला ५ कोटी ५० लाख २० हजार रुपये, नेरूळ सेक्टर-२७ येथील इकरा इंटरनॅशनल स्कूल २ कोटी २४ लाख ७० हजार रुपये, सीवूड सेक्टर-४० येथील द ऑर्चिड इंटरनॅशनल स्कूल १ कोटी १९ लाख ५० हजार रुपये, रबाळे आंबेडकर नगर येथील इलिम इंग्लिश स्कूल ६ कोटी ५९ लाख ७० हजार रुपये दंड लावण्यात आला आहे.

केवळ यातील द ऑर्चिड इंटरनॅशनल स्कूल या शाळेने ३ लाख १० हजार रुपये दंड भरला आहे. अन्य कोणत्याही शाळेने महापालिकेच्या नोटिशीला दाद दिली नाही. यादरम्यान वारंवार नोटिसा पाठवल्यामुळे ३५ पैकी काही शाळा बंद झाल्या; तर काही शाळांना शासनाकडून मान्यता मिळाली आहे.