Navi Mumbai: ठाणे लोकसभेचे शिवसेनेचे उमेदवार नरेश म्हस्के यांच्या प्रचारासाठी नवी मुंबईतील बेलापूर मतदारसंघात गुरूवारी (ता. ९) रॅली काढण्यात येणार असून यावेळी मुख्यमंत्री एकनाथ शिंदे सहभागी होणार आहेत.

निवडणूक जाहीर झाल्यानंतर मुख्यमंत्री पहिल्यांदाच नवी मुंबईत येणार असल्याने ते काय बोलणार, याकडे सर्वांचे लक्ष लागले आहे. ठाणे लोकसभा मतदारसंघात उमेदवारी मिळवण्यात शिवसेनेने बाजी मारली आहे. त्यामुळे भाजपमध्ये नाराजी निर्माण झाली होती.

त्यानंतर आता पहिल्यांदाच एकनाथ शिंदे नवी मुंबईत येत आहेत. सकाळी सहा वाजता एपीएमसी मार्केटपासून या रॅलीला सुरुवात होणार आहे. सकाळी ९ वाजता प्रचार फेरी तुर्भे येथे येणार आहे. वाशी, सानपाडा, नेरूळ- सेक्टर २, ८, १०, गुडविल चौकाजवळून गावदेवी आणि महानगरप्रमुख अशोक गावडे यांच्या कार्यालयाजवळ रॅली समाप्त होणार आहे.

भाजप, शिवसेना, मनसे, राष्ट्रवादी अजित पवार गट पक्षाचे कार्यकर्ते, पदाधिकारी यानिमित्त एकत्र येणार आहेत. नरेश म्हस्के यांच्याविरोधात ठाकरे गटाचे विद्यमान खासदार राजन विचारे रिंगणात उभे असल्याने महायुतीला जोर लावावा लागणार आहे.