मुंबई : एनसीबीचे (NCB) वरिष्ठ अधिकारी समीर वानखेडे (sameer wankhede) यांच्याविरुद्ध रोज बेफाट आरोप करणारे व त्यांना धमक्या देणारे मंत्री नबाब मलिक (Nawab Malik) यांच्यावर कारवाई करावी, या मागणीसाठी आज भारतीय जनता पक्षाचे (BJP) मुंबई अध्यक्ष मंगलप्रभात लोढा (Mangal prabhat lodha) यांच्या नेतृत्वाखालील शिष्टमंडळाने राज्यपाल भगतसिंह कोश्यारी (Bhagat singh koshyari) यांची भेट घेतली.

नबाब मलिक यांच्या जावयाला एनसीबीने अमली पदार्थांच्या व्यापारप्रकरणी अटक केली आहे. त्यामुळे चिडून मलिक यांनी वानखेडे यांच्यावर पुराव्याशिवाय बेलगाम आरोप करण्याचा सपाटा लावल्याचाही आरोप भाजपतर्फे करण्यात आला. याप्रकरणी आता भाजपने आक्रमक भूमिका घेतल्याचे आज स्पष्ट झाले. सरकारी अधिकाऱ्यांना धमक्या देण्याची मलिक यांना इच्छा असेल तर त्यांनी सर्वप्रथम आपल्या मंत्रीपदाचा राजिनामा द्यावा, असेही लोढा यांनी सांगितले.

मलिक सरकारी अधिकाऱ्यांना धमक्या देत असून ही महाराष्ट्राच्या राजकारणाला काळीमा फासणारी गोष्ट आहे. यावर कारवाई झालीच पाहिजे, अशी मागणीही राज्यपालांकडे करण्यात आली. मलिक यांचे आरोपांचे सत्र त्वरित थांबले नाही तर यासंदर्भात आम्ही राष्ट्रपती व केंद्रीय गृहमंत्री यांची भेट घेऊ. तसेच वेळ पडलीच तर आम्ही याविरुद्ध न्यायालयातही जाऊ, असा इशाराही लोढा यांनी दिला.

राज्य सरकारमधील महत्वाचे मंत्रीच कायदा धाब्यावर बसवून उघडपणे वरिष्ठ सरकारी अधिकाऱ्यांना रोजच्या रोज धमक्या देत आहेत. त्यांच्यावर वाटेल ते खोटे आरोप करीत आहेत. मलिक आपल्या पदाचा दुरुपयोग करीत असून ते योग्य नाही. ही बाब महाराष्ट्राच्या इतिहासात प्रथमच होत आहे. त्यामुळे राज्याच्या कायदा व सुव्यवस्थेवर परिणाम होण्याची भीती असल्याने राज्यपालांनी हस्तक्षेप करावा. सरकारी अधिकाऱ्यांना धमक्या देणाऱ्यांना शिक्षा द्यावी, अशी मागणीही आपण राज्यपालांकडे केल्याचे लोढा यांनी नंतर प्रसारमाध्यमांना सांगितले.