मुंबई- राष्ट्रवादी काँग्रेसचे नेते नवाब मलिक अजित पवार यांच्या भेटीसाठी देवगिरी बंगल्यावर दाखल झाले आहेत. सुनिल तटकरे देखील देवगिरीवर पोहोचले आहेत. नवाब मलिक आणि अजित पवार यांच्यामध्ये महत्त्वाची चर्चा होणार असल्याचं सांगण्यात येतंय. असे असले तरी नेमकी कोणत्या विषयावर चर्चा होईल याबाबत कळू शकलेलं नाही. (ncp nawab malik to meet ajit pawar on devgiri bungalow bjp)

नवाब मलिक यांच्यावरुन महायुतीमध्ये मिठाचा खडा पडला होता. अशात नवाब मलिक अजित पवारांची भेट घेण्यासाठी देवगिरीवर आले असल्याने सगळ्यांच्या भुवया उंचावल्या आहेत. अधिवेशनाच्या पहिल्याच दिवशी नवाब मलिक सभागृहात आले होते. त्यावरुन मोठा गदारोळ झाला होता. उपमुख्यमंत्री देवेंद्र फडणवीस यांनी यासंदर्भात अजित पवारांना पत्र लिहिलं होतं.

गंभीर गुन्ह्यात आरोप असलेले नवाब मलिक यांना सोबत घेऊ नये अशा आशयाचं पत्र फडणवीसांनी अजित पवारांना लिहिलं होतं. या मुद्द्यावरुन अजित पवारांनी मौन बाळगलं. त्यानंतर मुख्यमंत्री यांनी याबाबत माझी समजूत काढली आहे. हा विषय इथेच संपला असं ते म्हणाले होते. पण, आता नवाब मलिक हे देवगिरीवर आले असल्याने त्यांचा अजित पवार गटाला पाठिंबा आहे का? असा प्रश्व पडला आहे.

सूत्रांनी दिलेल्या माहितीनुसार, मतदारसंघातील कामे होत नसल्याने नबाव मलिकांनी अजित पवारांची भेट घेतली आहे.(Latest Marathi News)