Malegaon Blast : मालेगाव येथील २००८ साली झालेल्या बॉम्बस्फोट प्रकरणातील फरार आरोपी रामचंद्र कालसंग्राची मालमत्ता जप्त करण्याचे आदेश विशेष एनआयए न्यायालयाने (ता.९) दिले. मध्य प्रदेशातील शहजानपूरच्या जिल्हाधिकाऱ्यांना मालमत्ता जप्तीची कारवाई करण्यास न्यायालयाने सांगितले आहे.

२९ सप्टेंबर २००८ रोजी मालेगाव येथे मशिदीजवळ बाॅम्बस्फोट झाला होता. त्यात सहा लोकांचा मृत्यू, तर १०० हून अधिक जण जखमी झाले. भाजप खासदार साध्वी प्रज्ञासिंग ठाकूर यांच्यासह एकूण १३ आरोपी असून त्यातील ५ आरोपींची सुटका झाली आहे, तर रामचंद्र गोपालसिंग कालसंग्रा उर्फ रामजी उर्फ ओमजी उर्फ पटेल आणि संदीप डांगे हे दोघे फरार आहेत.

कालसंग्राविरुद्ध विविध बॉम्बस्फोट प्रकरणांत गुन्हे दाखल आहेत. समझोता एक्स्प्रेसमधील बॉम्बस्फोट, २००६ मधील मालेगाव बॉम्बस्फोट आणि २००७ मधील हैदराबादच्या मक्का मशिदीत झालेल्या बॉम्बस्फोटात कालसंग्राचा सहभाग होता, असा आरोप आहे. न्यायालयाने त्याच्याविरोधात रेड कॉर्नर नोटीसही बजावली आहे. वाॅरंट तसेच फरार घोषित केल्यानंतरही कालसंग्रा न्यायालयात हजर राहिला नाही. या पार्श्वभूमीवर विशेष एनआयए न्यायालयाचे न्या. ए. के. लाहोटी यांनी कालसंग्राची मालमत्ता जप्त करण्यास मुभा दिली.