Mumbai Police : मुंबई पोलिस दलात कंत्राटी स्वरुपाची भरती होणार असल्याचे वृत्त एका दैनिकाने प्रकाशित केले होते.मात्र हि बातमी धादांत खोटी असल्याची माहिती गृहविभागातील सूत्रांनी 'साम टीव्ही'ला दिली आहे.पोलिस भरती कुठल्याही परिस्थितीत कंत्राटी स्वरुपाची होत नाही आणि होणारही नाही, अशी माहिती गृहविभागातील उच्चपदस्थ सूत्रांनी दिलेली आहे.

अधिक माहिती अशी कि, गेल्या काळात पोलिस भरती न झाल्याने आणि गेल्या पोलिस आयुक्तांनी सुमारे 4500 पोलिस जिल्हा बदल्यांसाठी सोडल्याने मुंबई पोलिस दलात मनुष्यबळाची कमतरता निर्माण झाली. पोलिस शिपायांची सुमारे 10 हजार पदे रिक्त आहेत. ही रिक्त पदे भरण्यास सुद्धा मंजुरी देण्यात आली असून, त्यांचे प्रशिक्षण पूर्ण होऊन ते मिळण्यास विलंब लागतो. अशी बातमी समोर आली होती.

त्या बातमीत असेही नमूद होते कि, पोलिस भरती करुन नियमित पोलिस सेवेत दाखल होईस्तोवर मुंबईची कायदा-सुव्यवस्था वार्‍यावर सोडू शकत नाही, त्यामुळे मुंबई पोलिस दलाने शासनाच्याच महाराष्ट्र राज्य सुरक्षा महामंडळाकडून सुमारे 3000 मनुष्यबळ तुर्तास वापरण्याचे ठरविले. जोवर नियमित पोलिस उपलब्ध होत नाही, तोवरच या सेवा घेण्यात येणार आहेत.असे वृत्त होते. मात्र हे वृत्त खोटे असल्याचे समोर आले आहे.