म्हसळा (वार्ताहर) : म्हसळा तालुक्‍यातील मेंदडी गावामधील बौद्ध व मुस्लिम वस्तीत गेले सहा महिने पाणीपुरवठा होत नाही. या संदर्भात नागरिकांनी तहसीलदार व गटविकास अधिकारी म्हसळा यांच्याकडे तक्रार केली आहे.

मेंदडी गावातील बौद्ध व मुस्लिम समाज, प्राथमिक आरोग्य केंद्र व परिसरात आणि अन्य काही भागांत गेल्या सहा महिन्यांपासून पाणीपुरवठा होत नाही. १९३३ संमिश्र लोकसंख्या असलेल्या या गावात सरकारच्या माध्यमातून २००७-०८ पासून वर्धीत वेग कार्यक्रमांर्तगत नळ पाणीपुरवठा योजनेला मंजुरी होती. अध्यक्ष व सचिव ग्रामीण पाणीपुरवठा व स्वच्छता समिती मेंदडीच्या माध्यमातून कामाची पूर्तता झाली आहे. प्राथमिक आरोग्य केंद्रामार्फत गट विकास अधिकारी व ग्रामपंचायतीकडे याबाबतचा पत्रव्यवहारही केला आहे. मात्र, तरीही यावर प्रशासनाने तोडगा काढला नाही. 

नागरिकांनी मे-जूनमध्ये खासगी टॅंकरमार्फत पाणी विकत घेतले होते. तर गेले काही महिने पावसाळी पागोळीचे पाणी वापरून वेळ मारून नेल्याचे नागरिकांकडून सांगण्यात येते. मेंदडी गावाला मेंदडी धरणातून ग्रॅन्हेटी व पपांच्या साह्याने पाणीपुरवठा होत असतो. परंतु, म.रा.वि.वि. कंपनीचे दोन लाखाचे वीजबिल थकीत आहे. स्थानिक ग्रामीण पाणीपुरवठा व स्वच्छता समितीने निगा, देखभाल, दुरुस्ती करणे आता बंद केले आहे. यासाठी शेख नजीर, अब्दुल रहेमान चांदले, सुनीता मोरे, मीनाक्षी येलवे यांनी व अन्य मंडळींनी तहसीलदार व गटविकास अधिकारी म्हसळा यांच्याकडे तक्रारही केली. 

पुणे-दिघी रस्त्याचे कामात जलवाहिनी अडकल्याने तूर्त काही भागांत पाणीपुरवठा होत नाही. २००७-०८ मध्ये आलेला निधी संपवून काम पूर्ण केल्यावर योजना अंतिम करण्यासाठी स्थानिक ग्रामीण पाणीपुरवठा व स्वच्छता समितीकडे योजनेबद्दलचे वेगवेगळे दाखले, प्रमाणपत्रे, ठराव सतत मागणी करूनही कागदपत्रे दिली नसल्याने १९ जुलैला ही योजना ग्रामपंचायत मेंदडीकडे वर्ग करण्यात आली आहे. योजनेतून पाणीपुरवठा करण्याची संपूर्ण जबाबदारी ग्रामपंचायतीची आहे.
- युवराज गांगुर्डे, उपअभियंता, ग्रामीण पाणीपुरवठा, म्हसळा