मुंबई: मुंबईत गुरूवारी आणखी एका पोलिसाचा कोरोनामुळे मृत्यू झाला. त्यामुळे मुंबईतील मृत पोलिसांचा आकडा 40 वर पोहोचला आहे. मुंबई पोलिस दलातील कोरोना बाधीत पोलिसांवरील उपचारावर लक्ष ठेवण्यासाठी तज्ज्ञ डॉक्टरांचे पथक तयार करण्यात आले आहे.

पायधुनी पोलिस ठाण्यात कार्यरत 57 वर्षीय सहाय्यक उपनिरीक्षकाचा गुरूवारी कोरोनामुळे मृत्यू झाला. ते दक्षिण मुंबईतील रहिवासी होते. तीन महिन्यात ते निवृत्त होणार होते. पण त्यापूर्वीच उपचारादरम्यान त्यांचा मृत्यू झाला. 

हेही वाचा: अरे वाह!! लॉकडाऊनमध्येही 'बेस्ट' सुसाट; बेस्टचे रोजचे उत्पन्न तब्बल 'इतक्या' लाखांवर..

चार दिवसांपूर्वी उपचारासाठी त्यांना जीटी रुग्णालयात दाखल करण्यात आले होते. 55 वर्षांवरील पोलिसांना कोरोना काळात सुटी दिल्यामुळे ते सध्या घरीच होते. त्यांच्या पश्चात मुलगा व मुलगी असा परिवार आहे. राज्यातील  62 पोलिसांचा आतापर्यंत कोरोनामुळे मृत्यू झाला आहे.

कोरोनाबाधीत पोलिसांसाठी डॉक्टरांचे विशेष पथक:

कोरोना बाधीत पोलिसांचे स्वास्थ व त्यांच्या देण्यात आलेले उपचार यावर लक्ष ठेवण्यासाठी मुंबई पोलिसांनी तज्ज्ञ डॉक्टरांचे विशेष पथक नियुक्त केले आहे.  त्यांच्या मार्फत प्रकृती गंभीर असलेल्या पोलिसांवर सुरू असलेल्या उपचारांवर लक्ष ठेवले जात आहे. याशिवाय लक्षण अलेल्या पोलिसांच्या स्थितीबाबतही पाहणी केली जात आहे. 

हेही वाचा: आता बीएमसी करणार मृत्यूची ऑनलाईन नोंद; मृतांच्या संख्येतील गोंधळ दूर करण्यासाठी निर्णय..

हे पथक नागपाडा येथील पोलिस रुग्णालयात सध्या बसत आहे. याशिवाय मुंबईतील चार कोविड केअर सेंटर व पोलिस हेल्पलाईनकडेही या पथकामार्फत लक्ष ठेवले जात आहे.

now special doctors for corona affected police in mumbai