मुंबई : मुंबईतील नागपाडा परिसरात शाळेत शिक्षिकेचा विनयभंग केल्याची घटना समोर आली आहे. शिक्षिकेचे छायाचित्र काढून तिच्याबद्दल अश्लील टिप्पणी करणाऱ्या शाळेतील कर्माचाऱ्याविरोधात नागपाडा पोलिसांनी शुक्रवारी गुन्हा दाखल केला आहे.

आरोपीला नोटीस देत हजर होण्यासाठी सांगण्यात आल्याचे नागपाडा पोलिसांनी सांगितले आहे.तक्रारदार 44 वर्षीय महिला भायखळा येथील शाळेत शिक्षिका म्हणून काम करते. 55 वर्षीय आरोपी त्याच शाळेत काम करतो. आरोपी पीडित शिक्षिकेला 2015 पासून त्रास देत होता.महिला शिक्षिकेच्या परवानगीशिवाय त्याने तिचे छायाचित्र काढले होते.

तसेच त्याने महिलेबाबत अश्लील व अपमानजनक टिप्पणीही केली. नेहमीच्या या त्रासाला कंटाळून अखेर शिक्षिकेने याप्रकरणी पोलिसाकडे तक्रार केली. त्या तक्रारीवरून पोलिसांनी आरोपीविरोधात धमकावणे व अश्लील टिप्पणी केल्याप्रकरणी गुन्हा दाखल केला. आरोपी विरोधात नागपाडा व आग्रीपाडा पोलीस ठाण्यात धमकावणे व अश्लील टिप्पणी केल्याप्रकरणी यापूर्वी दोन गुन्हे दाखल आहेत