मुंबई : पश्चिम रेल्वेच्या दहिसर ते बोरिवली स्थानकादरम्यान अप जलद मार्गांवरील ओव्हर हेड वायर बुधवारी सकाळी तूटल्याने चर्चगेटकडे जाणारी वाहतूक ऐन गर्दीच्या वेळी ठप्प झाली होती. त्यामुळे तब्बल १८ लोकल फेऱ्या रद्द करण्याची नामुष्की पश्चिम रेल्वेवर आली आहे. लोकल सेवांच्या वेळापत्रकारांवर मोठा परिणाम झाला आहे. त्यामुळे सकाळी कामावर जाण्यासाठी निघालेल्या मुंबईकरांचे प्रचंड हाल झाले आहे.

पश्चिम रेल्वेने दिलेल्या माहितीनुसार, बुधवारी सकाळी १० वाजून २ मिनिटांच्या सुमारास दहिसर ते बोरिवली दरम्यान अप जलद मार्गावरील ओव्हर हेड वायर तुटली. ओव्हरहेड वायर तुटल्याने लोकलला होणारा विदयुत पुरवठा खंडित झाला. तसेच ओव्हरहेड वायर एसी लोकलच्या पेंटाग्राफमध्ये अडकून पडला होता.

त्यामुळे चर्चगेट दिशेने जाणाऱ्या लोकल एकामागेएक जागीच खोळंबल्या. या घटनेमुळे एसी लोकसह तीन लोकल रखडल्या होत्या. चर्चगेटकडे जाणारी अप जलद मार्गावरील वाहतूक अप धीम्या मार्गांवरून वळविण्यात आली. त्यामुळे अप धीम्या मार्गावरील लोकलचे वेळापत्रक कोलमडले. याचा फटका सकाळी कामावर जाण्यासाठी निघालेल्या प्रवाशाना बसला. तसेच मुंबईच्या दिशेने येणाऱ्या मेल- एक्सप्रेस गाडयांना मोठा फटका बसला आहे.

दीड तासानंतर बिघाड दुरुस्त

या घटनेची माहिती मिळताच पश्चिम रेल्वेचे अभियांत्रीकी पथक ओव्हर हेड वायर दुरुस्तीची वॅगन घेऊन घटना स्थळी पोहचले. एसी लोकलच्या पेन्टाग्राफमध्ये अडकलेल्या ओव्हर हेड वायर काढण्यात आला. त्यानंतर तब्बल दीड तासानंतर तुटलेला ओव्हर वायर जोडण्यात आला. सकाळी ११ वाजून ३२ मिनिटांनी अप जलद मार्गांवरील लोकल वाहतूक सुरु करण्यात आली. मात्र, तेव्हापर्यत प्रवाशांना प्रचंड हाल झाले आहे.

एसी लोकल अडकली

या घटनेमुळे एसी लोकलमधील विद्युत पुरवठा बंद झाल्याने एसी लोकलमध्ये प्रवाशांच्या श्वास गुदमरत होता. एसी लोकलमध्ये असणाऱ्या सर्व प्रवाशांना उष्णतेचा त्रास होत होता. प्रवाशांच्या आरडाओरडनंतर एसी लोकलचे दार उघडण्यात आले. त्यानंतर प्रवाशांनी रेल्वे रुळावरून चालत जात दुसरे रेल्वे स्थानक गाठले आहे. त्यामुळे एसी लोकलच्या प्रवाशांचे प्रचंड हाल झाले आहे.