मुंबई : ओमिक्रॉन व्हेरिएंटमुळे संपूर्ण जगाची चिंता वाढली आहे. महाराष्ट्रात देखील ऑमिक्रॉन व्हेरियंटचे रुग्ण दिवसेंदिवस वाढताना दिसत आहेत. इतर राज्यांच्या तुलनेत महाराष्ट्रात जास्त रुग्ण आढळून येतान दिसत आहेत. मुंबई परिसरामध्ये ओमिक्रॉनचे चार रुग्ण सापडल्याने आता मुंबई पोलिसांनी नवे निर्बंध लागू करण्याचा निर्णय घेतला आहे. हे वर्ष संपण्याचा मार्गावर असताना 31 डिसेंबर रोजी पार्टीच्या निमित्ताने अधिक गर्दी होण्याची शक्यता आहे. त्यामुळेच मुंबई पोलिसांनी नियमावलीचं नवं परिपत्रक काढलं आहे. हे निर्बंध 16 डिसेंबर ते 31 डिसेंबर या दरम्यानच्याच काळात लागू असणार आहेत. यानुसार, सर्व मुंबईकरांना कोरोना नियमावलीचं पालन करणं अनिवार्य असणार आहे.

काय आहे मुंबई पोलिसांच्या परिपत्रकात?

• आयोजित कार्यक्रमातील, सेवेशी निगडीत असणारे आयोजक, सहभागी, अभ्यागत, पाहुणे, ग्राहक या सर्वांचेच पूर्णपणे लसीकरण झालेले असणे अनिवार्य आहे.

• कोणतेही दुकान, आस्थापना, मॉल, कार्यक्रम, मेळावे याठिकाणी आलेल्या व्यक्तींचे पूर्ण लसीकरण झालेले हवे. अभ्यागत, ग्राहक यांचेही लसीकरण झाले पाहिजे.

• मुंबईतील सर्व सार्वजनिक वाहतूक सेवेने प्रवास करणाऱ्या व्यक्तींचे लसीकरण झाले असावे. पूर्ण लसीकरण न झालेल्या व्यक्तींना प्रवास करण्यावर बंदी असणार आहे.

• महाराष्ट्रात येणाऱ्या किंवा प्रवास करणाऱ्या व्यक्तींचे पूर्ण लसीकरण अथवा ७२ तासांपूर्वी करण्यात आलेली आरटी पीसीआर चाचणीच वैध असणार आहे.

• कोणत्याही कार्यक्रम, स्पर्धा, मेळावे, समारंभ याठिकाणी क्षमतेच्या 50 टक्केच लोक उपस्थित राहू शकतात. जर एकूण उपस्थित लोकांची संख्या १ हजारापेक्षा जास्त असल्यास स्थानिक प्राधिकरणाला याबाबत माहिती द्यावी लागणार आहे.

• बंदीस्त सभागृह, बंदिस्त रेस्टॉरंट, हॉलमध्ये 50% क्षमतेपेक्षा जास्त लोकांना एकत्र येता येणार नाही.

• मोकळ्या जागी 25% क्षमतेपेक्षा जास्त लोकांना एकत्र येता येणार नाही.

• 31 डिसेंबर आणि ख्रिसमस निमीत्त होणा-या पार्ट्यांवर नजर ठेवण्याकरता प्रत्येक वॉर्ड मध्ये महापालिकेची 4 पथकं तैनात असतील.

• नियम मोडणाऱ्या पार्ट्या आढळल्यास संबंधित रेस्टॉरंट मालक, हॉटेलमालक यांच्यावरही नियमाप्रमाणे कारवाई करण्यात येईल.