मुंबई: बडा कब्रस्तान ही देशातील एक मोठी दफनभूमी आहे. मरीन लाइन्स येथे सात एकरमध्ये पसरलेल्या बडा कब्रस्तान येथे मुस्लिम समाजातील व्यक्तीचे निधन झाल्यानंतर दफन विधी केले जातात. जुमा मशीद ऑफ बॉम्बे ट्रस्टकडून या दफनभूमीचे व्यवस्थापन केले जाते. कोविडमुळे मार्चच्या तुलनेत एप्रिल महिन्यात बडा कब्रस्तान येथे दफनविधीचे प्रमाण वाढले आहे.

एक एप्रिल ते १६ एप्रिल या कालावधीत बडा कब्रस्तानमध्ये १४५ मृतदेहांचे दफन करण्यात आले. यातले ६७ दफनविधी हे कोविड रुग्णांचे होते. मार्च महिन्यात बडा कब्रस्तानमध्ये १३४ दफनविधी करण्यात आले. त्यावेळी २९ मृत्यू हे कोविडशी संबंधित होते. मिड डे ने हे वृत्त दिले आहे.

'मागच्या आठवड्यात मृत्यूचे प्रमाण वाढले आहे' असे जुमा मशीद ऑफ बॉम्बे ट्रस्टचे अध्यक्ष शोएब खातिब म्हणाले. "१३ एप्रिल ते १७ एप्रिल या चार दिवसात ५० मृतदेहांचे दफन करण्यात आले. त्यात कोविडच्या आजाराने मरण पावलेले २४ जण होते. बडा कब्रस्तानमध्ये कोविडच्या आजाराने मृत्यू झाल्यानंतर होणाऱ्या दफनविधीचे प्रमाण ५० टक्क्यापेक्षा जास्त आहे" असे शोएब खातिब म्हणाले.