अलिबाग : रायगड (Raigad) जिल्ह्यात रविवारी (ता. २७) पल्स पोलिओ लसीकरण मोहीम (Polio vaccination drive) राबविण्यात येत आहे. या मोहिमेअंतर्गत पाच वर्षांपर्यंतच्या एक लाख ८२ हजार २८९ बालकांना दोन हजार ५२५ बुथवर पोलिओ डोस (Polio dose) देण्यात येणार आहे. यासाठी आरोग्य यंत्रणा सज्ज झाली आहे. मोहिमेत जिल्ह्यातील ग्रामीण व शहरी भागातील एक लाख ८२ हजार २८९ बालकांना पोलिओ डोस (polio dose for children) देण्यात येणार आहे. त्यासाठी ग्रामीण भागात दोन हजार ३८२ आणि शहरी भागात १४३ असे एकूण दोन हजार ५२५ बुथवर लशीची व्यवस्था करण्यात आलेली आहे.

याव्यतिरिक्त बस डेपो, रेल्वे स्थानक इत्यादी ठिकाणीसुद्धा लस देण्याची व्यवस्था करण्यात आलेली आहे. या कार्यक्रमासाठी पाच हजार ६४७ आरोग्य कर्मचाऱ्यांची बुथवर नेमणूक करण्यात आलेली असून, अंगणवाडी सेविका, आशा, शिक्षक तसेच खासगी संस्थांचादेखील यामध्ये सहभाग घेण्यात आलेला आहे.

पाच वर्षांपर्यंतच्या बालकांना पोलिओसारख्या रोगापासून संरक्षण करण्यासाठी या लशीचा डोस देणे अत्यंत आवश्यक आहे. सर्व बालकांना या दिवशी पोलिओची लस पाजून कार्यक्रमात सहभागी व्हावे व सहकार्य करावे, असे आवाहनही डॉ. किरण पाटील व डॉ. सुधाकर मोरे यांनी केले आहे.