दोन महिन्‍यांत १८ लाखांहून अधिक दंड वसूल
मुलुंड वाहतूक पोलिसांची कारवाई
मुलुंड, ता. ८ (बातमीदार) ः मुलुंड वाहतूक पोलिसांनी एप्रिल आणि मे २०२४ दरम्यान वाहतूक नियमांचे उल्लंघन करणाऱ्या २७ हजार २६७ वाहनचालकांवर कारवाई करत १८ लाख २५ हजार २५० रुपयांचा दंड वसूल केला. भांडुपच्या एस वॉर्डपासून मुलुंड चेकनाकापर्यंत वाहतूक पोलिसांकडून वाहनांची तपासणी केली जात आहे. एप्रिल २०२४ मध्ये १३ हजार ५३२ वाहनांवर कारवाई करून ९ लाख ७९ हजार ८५० रुपयांचा दंड वसूल केला; तर मे महिन्यात १३ हजार ७३५ वाहनांवर कारवाई करून ८ लाख ४५ हजार ४०० रुपयांचा दंड वसूल करण्यात आला आहे. मुलुंड वाहतूक पोलिसांनी विविध भागांत पोलिस कर्मचारी वाहतुकीचे नियमन करण्यासाठी तैनात केले आहेत. कायद्यानुसार कारवाई करण्यात येत असल्यामुळे वाहनचालकांचे धाबे दणाणले आहेत.

नियमभंग करणाऱ्या वाहनचालकांकडून दंड आकारले जात आहे. याशिवाय चुकीच्या पद्धतीने वाहने चालवणाऱ्यांवरदेखील कारवाई केली जात आहे.
- अजित सुळे, वरिष्ठ पोलिस निरीक्षक
मुलुंड वाहतूक विभाग

संजीव देशपांडे