- सुशांत सावंत

मुंबई: दादरच्या ऐतिहासिक शिवाजी पार्क मैदानात (shivaji park ground) विद्युत रोषणाई करण्यात आली आहे. मुख्यमंत्री निधीतून हे रोषणाई साकारण्यात आली आहे. आता याच मुद्यावरुन महाराष्ट्र नवनिर्माण सेनेने (mns) शिवसेनेवर (shivsena) निशाणा साधला आहे. यापूर्वी सुद्धा शिवाजी पार्क मैदानाच्या सुशोभिकरणाच्या मुद्यावरुन शिवसेना आणि मनसेमध्ये शाब्दीक सामना रंगला होता. दोन महिन्यांपूर्वी शिवाजी पार्क सुशोभिकरणाच्या मुद्यावरुन महाराष्ट्र नवनिर्माण सेनेचे सरचिटणीस आणि प्रवक्ते संदीप देशपांडे (sandeep deshpande) यांनी शिवसेनेला उचलेकरांचा पक्ष म्हटलं होतं.

शिवाजी पार्क भागात मनसेच्या संकल्पनांची शिवसेना कॉपी करत असल्याचा आरोप संदीप देशपांडे यांनी केला होता. शिवाजी पार्क मैदान शिवसेना आणि मनसे दोघांसाठी महत्त्वाचं आहे. ऐतिहासिक घडामोडींचे साक्षीदार असलेल्या या मैदानाशी दोन्ही पक्षांची भावनिक नाळ जोडलेली आहे.

शिवसेनेच्या स्थापनेची पहिली भव्य सभा १९६६ मध्ये यांच मैदानावर झाली होती. मनसेच्या स्थापनेची ही पहिली सभा याच मैदानात पार पडली होती. मध्यंतरी इथे आमदार आणि नगरसेवक मनसेचे होते. त्यावेळी त्यांनी आपल्या निधीतून शिवाजी पार्कची शोभा वाढवण्यासाठी अनेक काम केली होती.

आता राज्यात सत्तेवर असलेली शिवसेना मुख्यमंत्री निधीतून इथे काम करत आहे. त्यावर मनसेने निशाणा साधला आहे. शिवाजी पार्क मैदानात विद्युत रोषणाईचे दिवे इटलीतून आयात करण्यात आल्याचा आरोप मनसेने केला आहे. दिवे हे इटली मधून आयात करणं हा योगायोग आहे की, इटली चं लांगुलचालन? असा सवाल मनसेने केला आहे.