मुंबई : ठाण्यातील चित्रकार आर. बी. होले यांच्या चित्रकलाकृतींचे प्रदर्शन जपानमधील फेई म्युझियम योकोहामा येथे भरविण्यात आले आहे. इंक व पेनने साकारलेल्या काळ्या शाईतील एकूण 39 कलाकृती "इन्फिनिटी' म्हणजेच अनंत या प्रदर्शनात मांडण्यात आल्या असून जपानमधील नागरिकांनीही होले यांच्या कलेचे कौतुक केले आहे. 
होले यांची आजपर्यंत न्यूयॉर्क, लंडन, वेनीस (इटली), टूरीन (इटली), चेन्नई व मुंबई अशी देश-विदेशात आठ एकल चित्रप्रदर्शने भरली आहेत. मागील वर्षी इटलीतील त्यांचे म्युझिक ऑफ युनिव्हर्स म्हणजेच विश्वास संगीत हे चित्रप्रदर्शन गाजले होते. यंदा जपान येथे होले यांनी आपली कलाकृती मांडली आहे. 9 जुलैपासून हे प्रदर्शन जपान येथे भरविण्यात आले आहे. येत्या रविवारपर्यंत हे प्रदर्शन खुले असून जपानमधील रसिकांनी प्रदर्शनाला भरभरून प्रतिसाद दिल्याचे होले यांनी सांगितले. 

आकाशाची भव्यता चित्रांमध्ये 
ठाणे येथे रहाणारे आर. बी. होले यांना लहानपणापासूनच चित्र काढण्याची आवड असून त्यांना आकाशाचे फार कुतूहल आहे. आकाशाची ही भव्यता, दिव्यता त्यांच्या चित्रामध्ये देखील दिसते. यावरूनच त्यांनी जपानमधील त्यांच्या प्रदर्शनाचे नावही "अनंत' असेच ठेवले आहे. संपूर्ण विश्व हे गुढतेने भरलेले असून, ही गूढमय कोडी आपल्या चित्रांद्वारे होले उलगडून सांगतात.