उल्हासनगर : कल्याण लोकसभेसाठी वंचितने मुस्लिम उमेदवार दिला आहे.अशा वेळी खासदार डॉ.श्रीकांत शिंदे यांना उल्हासनगरातील मुस्लिमांचा पाठींबा मिळवून देण्यासाठी माजी आमदार पप्पू कलानी व टीओके प्रमुख ओमी कलानी धावले आहेत. विशेष म्हणजे ज्या मुस्लिम नेत्यांनी डॉ.शिंदे यांना पाठींबा दिला आहे त्यात सर्वप्रथम वंचित बहुजन आघाडीकडून उमेदवारी अर्ज भरणारे आणि पक्षाने दुसरा उमेदवार जाहीर करताच माघार घेणारे जमिल खान उर्फ डॉन यांचाही समावेश आहे.

ओमी कलानी यांनी डॉ.श्रीकांत शिंदे यांना समर्थन दिले असून 'दोस्ती का गठबंधन' जाहीर केले आहे. शिंदेंच्या प्रचाराचा एक भाग म्हणून टीम ओमी कलानीच्या अल्पसंख्यांक विभागाची आढावा बैठक आयोजित करण्यात आली होती. या बैठकीला उपस्थित राहणारे डॉ.श्रीकांत शिंदे यांना मुस्लिमांचा पाठिंबा मिळवून देण्यासाठी पप्पू कलानी,ओमी कालानी यांनी पुढाकार घेतल्याची माहिती कालानी कुटुंबियांचे निकटवर्तीय माजी नगरसेवक मनोज लासी यांनी दिली.

या बैठकीत शिंदे म्हणाले, सध्या अनेक जण धर्माच्या नावावर लोकांची दिशाभूल करून मते मागत आहेत.पण आपण आज येथे एकत्र असून हिंदुहृदयसम्राट शिवसेनाप्रमुख बाळासाहेब ठाकरे हे मात्र सर्वांना सोबत घेऊन चालायचे. त्यामुळेच तेव्हा साबीरभाई शेख आणि आत्ता अब्दुल सत्तार मंत्री असल्याचे सांगितले.

महायुती सरकारने प्रत्येक मदरशाला पुनर्विकासासाठी निधी दिला आहे. शहरात एक चांगली उर्दू शाळा उभारण्यासाठी प्रयत्नशील राहणार असल्याचे डॉ.शिंदे यांनी सांगितले.

याप्रसंगी खासदार धैर्यशील माने, माजी आमदार पप्पू कलानी,माजी आमदार राजेश क्षीरसागर,भाजपा निरीक्षक श्रीकांत पाटील, शिवसेना प्रवक्ते किरण सोनावणे, उपजिल्हाप्रमुख अरुण आशान, टीओके प्रवक्ते कमलेश निकम, टीओके अल्पसंख्याक विभाग जिल्हाध्यक्ष मोनू सिद्दीकी, कार्याध्यक्ष मझहार मिर्झा, माजी नगरसेवक मनोज लासी,सदर हाजी रिझवान खान आदी पदाधिकारी आणि कार्यकर्ते उपस्थित होते.