उल्हासनगर - उल्हासनगर मधील एका इमारतीचा समोरील भाग बाल्कनीसह कोसळल्याची घटना गुरुवारी सायंकाळी घडली. द्वारकाधाम इमारतीचा भाग कोसळल्याची माहिती मिळताच पालिका प्रशासनाने तात्काळ धाव घेत इमारतीत राहणाऱ्या रहिवाशांना बाहेर काढत इमारत खाली केली.

उल्हासनगर कॅम्प 3 मधील रामायण नगरच्या बाजूला द्वारका धाम ही चार मजली इमारत आहे. या इमारतीत दोन विंग असून जवळपास 66 सदनिका आणि एक दुकान या इमारतीत होते. इमारत जुनी झालेली असून मोडकळीस आलेली असल्याने त्यात फारसे कुटुंब रहात नव्हते. इमारत जुनी झालेली असून पालिका प्रशासनाने ती धोकादायक घोषित केली आहे. मकातर तरी ही त्यात काही नागरिक वास्तव्यास होते.

गुरुवारी सायंकाळी या इमारतीचा रस्त्याकडील समोरचा भाग कोसळला. यावेळी रस्त्यावर रहदारी नसल्यामुळे कोणालाही दुखापत झाली नाही. तसेच ज्या सदनिकांचा बाल्कनीचा भाग कोसळला. त्या सदनिका ही रिकामी असल्यामुळे कोणत्याही प्रकारची जीवित तसेच वित्तहानी झालेली नाही.

सदर घटनेची माहिती अग्निशमन दल आणि पालिका प्रशासनाला मिळताच पालिकेचे सहाय्यक आयुक्त गणेश शिंदे, दत्तात्रय जाधव, अग्निशमन अधिकारी बाळू नेटके आदींनी इमारतीत राहणाऱ्या दोन कुटुंबांना इमारती बाहेर सुखरूप काढले. तसेच त्यानंतर इमारतीसमोरील मलबा काढण्याचे काम युद्धपातळीवर सुरू केले आहे. दुर्घटना ग्रस्त इमारत ही एका बाजूला झुकल्यासारखी वाटत असल्याने या इमारतीच्या बाजूची अन्य एक इमारत देखील खाली करण्यात आली आहे.