मुंबई : एसटीच्या महाराष्ट्र वाहतूक भवानातील खोली क्रमांक ६५ ही एसटीच्या अध्यक्षांसाठी राखीव असतांना माजी अध्यक्ष दिवाकर रावते यांचे खासगी स्विय सहाय्यक अशोक गव्हाने यांनी जवळपा दीड वर्षे मुक्काम या खोलीत केल्याचे उघडकीस आले आहे. मनोरा आमदार निवास पुर्नंबाधणीसाठी रिकामे केल्यापासून त्यांनी या खोलीचा लाभ घेतल्याचे समोर आले आहे. विशेष म्हणजे या खोलीचे नुतनीकरण करून त्यामध्ये वातानुकूलित सुविधाही देण्यात आल्या होत्या. तसेच खोलीच्या देखभाल-दुरूस्तीसाठी नियुक्त केलेल्या शिपायालाही अतिरीक्त कामाची खैरात वाटल्याचे उघडकीस आले आहे. मात्र, माजी अध्यक्षांच्या हवाल्यानेच ही खोली स्वीय सहाय्यकांना दिल्याचे स्थापत्य व अभियांत्रिकी विभागाचे कार्यकारी अभियंता प्रकाश पडलवार यांनी सांगितले. 

महत्वाची बातमी ः जेव्हा ऍमेझॉनचे मालक स्वतः देतात पॅकेजची डिलेव्हरी..

मुंबई सेंट्रल येथील महाराष्ट्र वाहतूक भवनातील सहावा माळ्यावरील खोली नंबर ६५ हे एसटीच्या अध्यक्षासाठी राखीव आहे. मात्र, गेल्या पाच वर्षात एसटीचे माजी अध्यक्षाचा कारभार माजी परिवहन मंत्री दिवाकर रावते यांच्याकडे असल्याने त्यांनी खोलीचा वापर केला नाही. त्यांच्याऐवजी गेल्या दीड वर्षांपासून त्यांच्या खासगी स्वीय सहाय्यकाने येथे नियमीत मुक्काम ठोकल्याचे उघड झाले आहे. लोकसभा, विधानसभा आणि राष्ट्रपती राजवटीच्या दरम्यान शासकीय सेवा घेण्यास मनाई असतानाही स्वीय सहायकाने सदर खोलीचा वापर केल्याचे उघडकीस आले आहे. या खोलीतील वातानुकूलित सुविधांचा खर्च एसटीच्या तिजोरीतून करण्यात आल्याने महाराष्ट्र वाहतूक भवनातील अधिकारी, कर्मचाऱ्यांमध्ये एकच चर्चा सुरु आहे. 

या खोलीसाठी एसटी कर्मचारी, अधिकाऱ्यांना ५०० रूपये, तर खासगी व्यक्तींना १००० रूपये प्रतिदिन शुल्क भरावा लागतो. मात्र, गेल्या पाच वर्षात ही खोली एसटीच्या अध्यक्षांसाठी राखीव केल्याने या खोलीत खासगी स्वीय सहाय्यकाने पूर्णवेळ मुक्काम ठोकला होता. 

कोण आहे खासगी स्वीयसहाय्यक?
औरंगाबाद येथील मूळ रहिवासी असलेले अशोक गव्हाणे माजी परिवहन मंत्री दिवाकर रावते यांचे खासगी स्वीय सहायक म्हणून कार्यरत होते. मनोरा आमदार निवास पुनर्बांधणीसाठी रिकामे केल्याने त्यांनी एसटीच्या महाराष्ट्र वाहतूक भवनातील सहाव्या माळ्यावरील खोली नंबर ६५ मध्ये आपला मुक्काम हलवला होता.

एसटीचे माजी अध्यक्षांनी सांगितल्याने त्यांच्या स्विय सहाय्यकांना ही खोली दिली होती. मनोरा आमदार निवास रिकामे झाल्यानंतर ते या खोलीत राहत होते. एसटीचे अध्यक्ष, त्यांचे नातेवाईक आणि स्वीय सहाय्यकांना खोली दिल्या जाते. 
-प्रकाश पडलवार, कार्यकारी अभियंता, स्थापत्य अभियांत्रिकी, एसटी.

खोलीच्या संदर्भात माहिती नाही. त्यासंदर्भात कार्यकारी अभियंता पडलवार हे माहिती देतील
- राजेंद्र जवंजाळ, महाव्यवस्थापक, एसटी 
बांधकाम विभाग