पंतप्रधान नरेंद्र मोदी यांचा आज मुंबईमध्ये रोड शो होणार आहे. त्यामुळे त्यांच्या सुरक्षेसाठी संध्याकाळी सहापासून घाटकोपर ते जागृतीनगर या मार्गावर मेट्रोची वाहतूक बंद करण्यात येणार आहे.

मुंबई मेट्रोने याबाबत एक्सवर पोस्ट करत माहिती दिली आहे. आपल्या पोस्टमध्ये मुंबई मेट्रोने म्हटले आहे की, "सुरक्षेच्या कारणास्तव, जागृती नगर आणि घाटकोपर मेट्रो स्थानकांदरम्यान, संध्याकाळी 06.00 वाजल्यापासून पुढील सूचना मिळेपर्यंत मेट्रो सेवा बंद ठेवण्यात येणार आहे. प्रवाशांनी त्यानुसार प्रवासाचे नियोजन करावे. गैरसोयीबद्दल दिलगीर आहे."

घाटकोपर स्थानक अंधेरी-वर्सोवा मेट्रो सेवा पूर्व आणि पश्चिम उपनगरांमधला एक महत्त्वाचा दुवा म्हणून काम करत असल्याने या निर्णयामुळे हजारो प्रवाशांवर परिणाम होणार आहे. दररोज तीन लाखांहून अधिक प्रवासी मेट्रो सेवेचा वापर करतात.

पूर्व मुंबईतील घाटकोपर परिसरात पंतप्रधान नरेंद्र मोदी यांच्या नियोजित रोड शोच्या आधी हा निर्णय घेण्यात आला आहे.

पंतप्रधान नरेंद्र मोदींचा २.५ किमीचा रोड शो घाटकोपरच्या एलबीएस रोडवरील श्रेयस सिनेमापासून रात्री ८ वाजता सुरू होईल आणि गांधी मार्केटमध्ये संपेल.

घाटकोपरमधील रोड शो दरम्यान, मुंबई पोलिसांनी वाहतूक बदल केल्याची सूचनाही यापूर्वी जारी केली होती.

मुंबई पोलीस अधिकाऱ्यांनी दिलेल्या माहितीनुसार, गांधी नगर जंक्शन ते नौपाडा जंक्शनपर्यंत एलबीएस रस्ता वाहनांसाठी बंद राहील आणि माहुल-घाटकोपर रस्ता मेघराज जंक्शन ते आरबी कदम जंक्शनपर्यंत दुपारी २ ते रात्री १० वाजेपर्यंत बंद राहील.

घाटकोपर मतदारसंघातील भारतीय जनता पक्षाचे उमेदवार मिहिर कोटेचा यांचा पंतप्रधान मोदी या रोड शोमध्ये प्रचार करणार आहेत.