मुंबई : पंजाब आणि महाराष्ट्र (पीएमसी) बॅंकेत कोणताही गैरव्यवहार झालेला नाही, असे प्रतिपादन शुक्रवारी (ता. 27) बडतर्फ व्यवस्थापकीय संचालक जॉय थॉमस यांनी पत्रकार परिषदेत केले. खात्यातून रक्कम काढण्याची मर्यादा 10 लाख रुपयांपर्यंत वाढवली जाईल, असे सांगत त्यांनी खातेदारांना दिलासा दिला. 

भारतीय रिझर्व्ह बॅंकेने पीएमसी बॅंकेवर 23 सप्टेंबरपासून सहा महिन्यांसाठी आर्थिक निर्बंध घातले आहेत. बॅंकेतून पैसे काढण्यावर निर्बंध आल्यामुळे खातेदार हवालदिल झाले आहेत. पीएमसी बॅंकेचे व्यवस्थापकीय संचालक जॉय थॉमस यांना प्रशासकाने बडतर्फ केले आहे. या पार्श्‍वभूमीवर थॉमस यांनी शुक्रवारी पत्रकार परिषद घेऊन बाजू मांडली. 

पीएमसी बॅंकेत घोटाळा झालेला नाही. ही परिस्थिती सात वर्षांपूर्वी निर्माण झाली आहे. त्यामुळे या कालावधीत मंजूर करण्यात आलेल्या कर्जांची माहिती देण्यात आली नाही, असे त्यांनी सांगितले. मदत मागण्यासाठी व स्पष्टीकरण देण्यासाठी आम्ही रिझर्व्ह बॅंकेकडे गेले होतो; मात्र कारवाई करण्यात आली, असे थॉमस म्हणाले.