भिवंडी : एकतर्फी प्रेम प्रकरणात अडथळा ठरणाऱ्या मुलीच्या वडिलांच्या अंगावर धारदार शस्त्राने वार करून हत्या (Murder crime) करण्यात आल्याची घटना भिवंडी तालुक्यातील कवाड गाव (kavad village in bhiwandi) येथे घडली आहे. पोलिसांनी तातडीने गुन्हा दाखल करून हत्या करणाऱ्याला थेट बिहार येथून अटक (culprit arrested) केली आहे. कमलजीत वारियम सांडे (वय ५५) असे हत्या झालेल्या व्यक्तीचे नाव आहे; तर पप्पू कुमार राजकिशोर साह (वय २६) असे अटक केलेल्या आरोपीचे नाव आहे.

कवाड गावाच्या हद्दीतील पेट्रोल पंपाशेजारील मोकळ्या निर्जन जागेत ९ मार्च रोजी एक मृतदेह आढळून आला होता. प्रत्यक्षदर्शींनी भिवंडी तालुका पोलिसांना माहिती दिल्यानंतर वरिष्ठ पोलिस अधिकाऱ्यांनी घटनास्थळी धाव घेतली. मृतदेहाचा पंचनामा करीत ओळख पाठवण्याचा प्रयत्न केला असता मृतदेह उल्हासनगर येथील कमलजीत वारियम सांडे यांचा असल्याचे निष्पन्न झाले. पोलिसांनी संशयित आरोपीचा शोध घेण्याचा प्रयत्न केला असता तो बिहार येथे पळून गेल्याचे समजले.

पोलिस पथकाने थेट बिहार गाठत तेथून आरोपी पप्पू कुमार राजकिशोर साह यास अटक केली. त्याने गुन्ह्याची कबुली दिली असून हत्या करण्यासाठी वापरलेले धारदार शस्त्र जप्त करण्यात आले आहे. आरोपीस दुपारी भिवंडी न्यायालयात हजर केले असता न्यायालयाने १९ मार्चपर्यंत पोलिस कोठडी ठोठावली आहे. अधिक तपास पोलिस उपनिरीक्षक सचिन दाभाडे करीत आहेत.

नियोजनबद्धरीत्या हत्या

आरोपी पप्पू गेल्या पाच वर्षांपासून शेजारी राहत असल्याने दोघांमध्ये ओळख होती. त्यामुळे आरोपीचे कमलजित यांच्या घरी येणे-जाणे होते. काही महिन्यांपूर्वी आरोपीने कमलजित यांच्या मुलीसोबत लग्न करण्यासाठी मागणी घातली. त्यामुळे दोघांमध्ये भांडणे होऊन कमलजित यांनी आरोपीला मारहाण केली होती. त्यानंतर आरोपीने कमलजित यांची माफी मागत पुन्हा बोलचाल सुरू केली; मात्र ४ मार्च रोजी आरोपीने कमलजीत यांची नियोजनबद्दरीत्या हत्या केली.