मुंबई - मुंबईतील यलोगेट पोलीस ठाण्यातर्गत येणाऱ्या ऑरेंज प्रवेशद्वारावर बंदोबस्तासाठी तैनात असलेल्या केंद्रीय औद्योगिक सुरक्षा दलाच्या (सीआयएसएफ) जवानाच्या रायफलचे मॅगझीन शनिवारी हरवली होती. त्याप्रकरणी 24 तासांत मॅगझीन हस्तगत करत 3 संशयीत आरोपीना ताब्यात घेण्यात पोलिसांना यश आले आहे.

गौरेश वगळ , श्रेयस चुरीया, अभिषेक माणगावकर अशी अटक आरोपीची नाव आहे.प्रकरणी यलोगेट पोलीस ठाण्यात गुन्हा दाखल करण्यात आला होता.

नेहमीप्रमाणे शनिवारी यलोगेट येथे सीआयएसएफ जवान कर्तव्यावर होता. त्यावेळी अचानक एक चारचाकी प्रवेशद्वारातून आत आली. कर्तव्यावरील सीआयएसएफ जवानाने गाडी थांबवत चालकाकडे चौकशी करू लागला.

मात्र त्याचवेळी जवानाला धक्का देत अचानक वाहन वेगाने सीएसएमटीच्या दिशेने निघून गेले. त्यावेळी जवानाची रायफल गाडीच्या दरवाजावर आपटल्यामुळे रायफलची आतील मॅगजिन गाडीत पडली. गाडी निघून गेल्यानंतर गोळ्यांनी भरलेली मॅगझीन रायफलमध्ये नसल्याचे जवानाच्या लक्षात आले.

गाडीत मॅगझीन पडल्याचा संशय आल्यानंतर वाहनाचा क्रमांक मिळवून सर्व प्रवेशद्वारावरील सीसीटीव्ही कॅमेऱ्यातील चित्रीकरण तपासण्यात आले. पोलिसांच्या मुख्य नियंत्रण कक्ष व इतर सीसीटीव्ही कॅमेऱ्यांच्या माध्यमातून संबंधित गाडीचा शोध घेतला असता, तीन संशयीत गौरव वगळ, श्रेयस चुरी व अजित माणगावकर यांना ताब्यात घेऊन चौकशी केली असता 30 जिवंत काडतुसे असलेली मॅगझीन जप्त करण्यात पोलिसांना यश आले आहे. याप्रकरणी गुन्ह्यात वापरण्यात आलेली मोटरगाडीही पोलिसांनी जप्त केली आहे.