मुंबईत इंडिया आघाडीची बैठक सुरू आहे. 31 ऑगस्ट म्हणजेच गुरुवारी बैठक झाल्यानंतर आज दुसऱ्या दिवशी शुक्रवारी देखील ही बैठक होणार आहे. या बैठकीदरम्यान, मुंबईत पोस्टर वॉर सुरूच असल्याचे पाहायला मिळाले आहे.

मुंबईतील इंडिया आघाडीच्या बैठकीदरम्यान शहरात विरोधी पक्षनेत्यांच्या पोस्टर्स लावण्यात आले होते. आता या पोस्टर्समध्ये आणखी काही पोस्टर्स लावण्यातआले आहेत . हा विरोधकांच्या आघाडीवर अप्रत्यक्ष हल्ला असल्याचे मानले जात आहे.

गुरुवारी देखील काही पोस्टर्सही समोर आले होते. यानंतर शुक्रवारी देखील इंडिया आघाडीच्या बैठक होत असलेल्या ठिकाणाजवळ मुख्यमंत्री एकनाथ शिंदे यांचे पोस्टर लावण्यात आले आहेत. या पोस्टरवर मुख्यमंत्री एकनाथ शिंदे यांचा फोटो लावण्यात आला असून, 'कष्टकरी, प्रामाणिक आणि निडर' अशा आशयाचा मजकूर या पोस्टर्सवर लिहिण्यात आला आहे.

यासोबतच शिवसेनेचे संस्थापक बाळासाहेब ठाकरे यांचा फोटो असलेले पोस्टर देखील लावण्यात आले होते. या पोस्टरवर 'मी शिवसेनेची काँग्रेस होऊ देणार नाही' असा मजकूर लिहीण्यात आला होता. या पोस्टरवर कोणत्याही पक्षाचे किंवा व्यक्तीचे नाव लिहिलेले नसले तरी शिंदे गटातील शिवसेनेने हे पोस्टर लावल्याचे बोलले जात आहे. या पोस्टरच्या माध्यमातून शिंदे गटाने उद्धव गटावर निशाणा साधला आहे. ज्या ठिकाणी इंडिया आघाडीची बैठक झाली त्याच ठिकाणी हे पोस्टर लावण्यात आले होते.