मुंबई : "माणदेशी फाऊंडेशन'तर्फे चौथा "माणदेशी महोत्सव' 9 ते 12 जानेवारीदरम्यान प्रभादेवीतील रवींद्र नाट्यमंदिराच्या प्रांगणात भरणार आहे. गावाकडील संस्कृतीचा प्रत्यक्ष अनुभव घेण्यासाठी मुंबईकरांनी या महोत्सवात सहभागी व्हावे, असे आवाहन माणदेशी फाऊंडेशनच्या अध्यक्ष चेतना सिन्हा यांनी केले आहे.

माणदेशी महोत्सवात मुंबईकरांना गावाची चावडी, घराचा ओटा, पडवी, गुरे-ढोरे, गड-किल्ले यांचा अनुभव सेल्फी पॉईंटमधून घेता येईल. माणदेशी महोत्सवाच्या प्रवेशद्वारापासूनच ग्रामीण संस्कृती आणि शिल्पकलेचा आनंद नागरिकांना घेता येईल. या महोत्सवात माणदेशी "जेन', घोंगडी, जाते, खलबत्ते, केरसुण्या, दुरड्या, सुपल्या आदी वस्तू खरेदी करता येईल.

माणदेशी गावरान ज्वारी, बाजरी, देशी कडधान्ये व चटकदार चटण्या-मसाल्यांची चव चाखण्याची संधी मुंबईकरांना मिळणार आहे. 

या वर्षी माणदेशी महोत्सवात 90 ग्रामीण उद्योजक आपली उत्पादने घेऊन सहभागी होणार आहेत. नागरिकांना घरी तयार केलेल्या खास सातारी चटण्या, पापड, लोणचे, खर्डा, ठेचा, शेव-पापड आणि आणि पेये खरेदी करता येतील.

ग्रामीण अर्थव्यवस्थेत महत्त्वाचे स्थान असलेले सुतार, लोहार, कुंभार यांची थेट कला पाहण्यास मिळणार आहे. आपण स्वत:च्या हाताने मडके अथवा लाटणे बनवण्यास किंवा फेटा बांधण्यास शिकू शकतो. चप्पल, दागिने आणि कापड तयार करणाऱ्या कारागिरांशी संवाद साधता येईल. 

सांस्कृतिक कार्यक्रम 
माणदेशी महोत्सवात सायंकाळी माणच्या मातीतील खेळ, लोकनृत्य, लोकसंगीताचा आनंद घेता येईल. माण तालुक्‍यातील गजा लोकनृत्याचा आस्वाद घेता येणार आहे. शेवटच्या दिवशी महिलांची कुस्तीची दंगल रंगेल, असे आयोजकांनी सांगितले.