पुणे : गणेश विसर्जन मिरवणुकीदरम्यान कोणतीही अनुचित घटना घडू म्हणून शहर पोलिसांनी नियोजन केले आहे. सर्व प्रमुख रस्त्यांवरील मिरवणुकांत संशयितांच्या हालचालींवर सीसीटीव्ही नियंत्रण कक्षातून लक्ष ठेवण्यात येईल.

यासाठी पोलिस दल सज्ज झाले आहे. सुमारे नऊ हजार पोलिस अधिकारी, कर्मचारी बंदोबस्तासाठी तैनात करण्यात आले आहेत. शहरात घातपात घडविण्यासाठी आलेल्या दोन दहशतवाद्यांना पोलिसांनी नुकतीच अटक केली.

त्यांचा एक साक्षीदार अद्याप फरारी असून त्याचा शोध घेतला जात आहे. या पार्श्वभूमीवर पोलिसांनी मागील काही दिवसांत झडती आणि नाकाबंदी करून सुमारे तेरा हजार संशयितांवर प्रतिबंधात्मक कारवाई केली.

मिरवणूक सौहार्दपूर्ण वातावरणात पार पडावी तसेच सुरक्षिततेच्यादृष्टीने पोलिस आयुक्त रितेश कुमार, पोलिस सहआयुक्त संदीप कर्णिक यांच्या मार्गदर्शनाखाली नियोजन करण्यात आले. त्यासाठी अतिरिक्त पोलिस आयुक्त प्रवीणकुमार पाटील,

रंजनकुमार शर्मा, रामनाथ पोकळे, अरविंद चावरिया, पोलिस उपायुक्त संदीपसिंग गिल, स्मार्तना पाटील, सुहेल शर्मा, शशिकांत बोराटे, विक्रांत देशमुख, अमोल झेंडे, श्रीनिवास घाडगे, ए. राजा, रोहिदास पवार तसेच सर्व सहायक आयुक्त, पोलिस निरीक्षक, उपनिरीक्षक आणि पोलिस कर्मचारी प्रयत्नशील आहेत.

साध्या वेशातही पोलिस

मोबाईल चोरी, सोनसाखळी चोरी आणि महिलांच्या छेडछाडीचे प्रकार रोखण्यासाठी साध्या वेशातील गुन्हे शाखेच्या पोलिसांचा बंदोबस्त असेल. गुन्हे शाखेतील सहायक आयुक्त-१ सुनील तांबे आणि सहायक आयुक्त-२ सतीश गोवेकर यांच्या मार्गदर्शनाखाली सर्व युनिट आणि पथकांकडून सराईत गुन्हेगार आणि चोरट्यांवर नजर ठेवण्यात येत आहे.

२०५ सीसीटीव्ही

प्रमुख मिरवणूक मार्गांवर २०५ सीसीटीव्ही बसविण्यात आले आहेत. पोलिस आयुक्तालय आणि विश्रामबाग पोलिस ठाण्यातील सीसीटीव्ही नियंत्रण कक्षातून संशयितांच्या हालचालींवर लक्ष ठेवण्यात येत आहे.