रोहा :  रोहा-तळेखार रस्त्याची दुरवस्था झाली असून ठिकठिकाणी खड्डे पडले आहेत. अतिवृष्टीमुळे येथे रस्ताच वाहून गेला आहे. त्यामुळे रस्त्याच्या दुरुस्तीची मागणी वाहनचालकांसमवेत नागरिकांकडून होत आहे. 

अलिबाग- चणेरा-रोहा या सुमारे ५५ किलोमीटर लांबीच्या या रस्त्यापैकी तळेखार ते रोहा हा ३५ किलोमीटर लांबीचा रस्ता रोहा सार्वजनिक बांधकाम विभागाच्या अखत्यारित येतो. 
या रस्त्यावर चणेरा, खारगाव, आरे, गोफण, शेडसाई, चांदगाव आदी गावे आहेत. या गावांतील ग्रामस्थांना विविध कामांकरिता रोह्याला व अलिबागला ये-जा करावी लागते. तसेच बाजारहाट व सरकारी कामांसाठी रोहा हे तालुक्‍याचे, तर अलिबाग हे जिल्ह्याचे ठिकाण गाठावे लागते. रुग्ण व विद्यार्थ्यांचे यामुळे हाल होतात.

या रस्त्यावर प्रवासाची सार्वजनिक साधने कमी असली तरी प्रवासी टमटमचा वापर अधिक करतात. तळेखार-रोहा रस्त्याची दुरवस्था झाली आहे. खड्ड्यांमुळे वाहने चालवणे धोकादायक झाले आहे. त्यामुळे रस्तादुरुस्तीची मागणी सामाजिक कार्यकर्ते सिद्धेश वाडकर यांनी केली आहे. 

रोहा-तळेखार रस्त्याची दुरवस्था झाली आहे. रस्तादुरुस्तीचे काम निविदा स्तरावर असून लवकरच रस्ता दुरुस्त करण्यात येणार आहे.
- अरुण देवकाते, उपविभागीय अभियंता, सार्वजनिक बांधकाम विभाग, रोहा.