पाली : वाकण-पाली-खोपोली राज्य महामार्ग ५४८ (अ) रुंदीकरणाची प्रक्रिया वेगाने सुरू आहे. ही कामे सुरू असताना येथील मार्गावर धुळीचे साम्राज्य निर्माण झाले आहे. त्यामुळे प्रवासी, वाहनचालक, व्यावसायिकांसह ग्रामस्थही हैराण झाले आहेत.

 या मार्गावर वाकण ते पाली, रासळ, वावे, चिवे, परळी, दुधानेवाडी, उंबरे, शेंबडी, मिरकुटवाडी ते पाली फाटा या ठिकाणी धुरळ्याची सर्वात अधिक समस्या आहे. मोटरसायकलस्वारांचे धुरळ्यामुळे हाल होत आहेत. या मार्गावरून जाताना दुचाकीस्वारांचा धुळीशी थेट संबंध येतो. हेल्मेट घातलेले असतानासुद्धा नाकतोंडात धूळ जाते. श्‍वसनाचे विकार असलेल्यांसह, लहान मुले व वृद्ध यांच्या आरोग्यावर विपरित परिणाम होत आहे; तर धुरळा उडत असल्याने समोरून ये-जा करणारी वाहने दिसत नसल्याने अपघातांच्या घटनांत वाढ झाली आहे. 

पावसाळ्यात महामार्गावरील खड्डे बुजविण्यासाठी माती आणि खडीचा वापर केला होता. आता ऊन पडून व वाहने जावून येथून धूळ बाहेर उडत आहे. याचा त्रास वाहनचालक, दुचाकीस्वार व प्रवाशांना होत आहे. तसेच महामार्गाशेजारील दुकानदार, हॉटेल व्यावसायिक व रहिवासीदेखील धुळीमुळे त्रस्त झाले आहेत. हा धुरळा वाहनचालक आणि प्रवाशांच्या अंगावर सर्वत्र बसतो.

महामार्गाशेजारी जी दुकाने, हॉटेल आणि घरे आहेत; त्यांनादेखील या धुळीचा खूप त्रास सहन करावा लागतो. वारंवार उडणारी धूळ खाद्य पदार्थ आणि वस्तूंवरदेखील बसते. त्यामुळे सतत साफसफाई करावी लागते. हॉटेलमधील खाद्यपदार्थ, दुकानातील व घरातील वस्तू आणि उपकरणे धुळीमुळे खराब होतात. त्यामुळे या मार्गाचे काम जलद गतीने करण्याची मागणी व्यावसायिक, चालक व प्रवाशांकडून होत आहे.

धुरळ्यावर उपाययोजना करत आहोत. बुधवारपासूनच मार्गावर असलेले खड्डे खडी व डांबराने भरण्यास सुरू केले आहेत. त्यामुळे धुरळ्याची समस्या कमी होईल. लवकरच रस्त्याचा बराचसा भाग पूर्ण करणार आहोत.
सचिन निफाडे, उपअभियंता, एमएसआरडीसी

या मार्गावर धुरळ्यामुळे प्रचंड त्रास सहन करावा लागत आहे. या मार्गाचे काम सध्या वेगाने सुरू आहे. येथील धुरळ्याच्या समस्येवर काहीतरी ठोस उपाययोजना करणे गरजेचे आहे. 
प्रकाश मुद्राळे, प्रवासी