अलिबाग ः शिकवणीच्या बहाण्याने बोलावून अल्पवयीन मुलीवर अत्याचार करणाऱ्या शिक्षकाला सत्र न्यायालयाने दहा वर्षे तुरुंगवासाची शिक्षा सुनावली आहे. अक्षय पाटील (22) असे आरोपीचे नाव आहे. तो पनवेल-खांदा कॉलनी येथील रहिवासी आहे. 
अक्षय याच्याकडे अल्पवयीन मुलगी शिकवणीसाठी जात होती.

जानेवारी 2015 ते 12 जून 2015 या कालावधीत त्याने अल्पवयीन मुलीवर वारंवार अत्याचार केले. अखेर त्याच्या जाचाला कंटाळून या मुलीने खांदेश्‍वर पोलिस ठाण्यात तक्रार केली. पोलिसांनी शिक्षकाविरोधात गुन्हा दाखल करून त्याला अटक केली. तपास पूर्ण करून त्याच्याविरोधात अलिबाग येथील सत्र न्यायालयात दोषारोपपत्र दाखल केले. या खटल्याची सुनावणी अतिरिक्त सत्र न्यायाधीश व्ही. एम. मोहिते यांच्या न्यायालयात झाली.

सरकार पक्षातर्फे अतिरिक्त शासकीय अभियोक्ता ऍड. अश्‍विनी बांदिवडेकर-पाटील यांनी सहा साक्षीदारांची साक्ष नोंदविली. त्यात पीडित मुलीची साक्ष महत्त्वाची ठरली. ऍड. अश्‍विनी बांदिवडेकर यांनी केलेला युक्तिवाद ग्राह्य धरून न्यायालयाने आरोपी अक्षय पाटील याला दोषी ठरवून दहा वर्षे तुरुंगवास; तसेच पाच हजार रुपये दंड अशी शिक्षा सुनावली.