पालीः नववर्षातील पहिल्या संकष्टी चतुर्थीनिमित्त येथील अष्टविनायकापैकी एक असलेल्या बल्लाळेश्‍वराच्या दर्शनासाठी सोमवारी (ता. 13) भाविकांची मोठी गर्दी होती. दर्शनासाठी भाविकांच्या रांगा लागल्या होत्या.

रस्त्यावरील भंगार हटविले

संकष्टीनिमित्त दर्शनासाठी रायगड जिल्हा, महाराष्ट्रातील विविध भागांसह मुंबई, ठाणे, पुणे आदी शहरांतील भाविक व पर्यटक मोठ्या प्रमाणावर पालीत दाखल झाले होते. अत्यंत भक्तिभावाने व शांततेत भाविक दर्शन घेताना दिसले. नेहमीप्रमाणे येथील दुकानदार व हॉटेल व्यावसायिकांचा धंदाही तेजीत होता. देवळात येणारे भाविक आवर्जून येथून खरेदी करत होते. अनेक कुटुंब बल्लाळेश्‍वराचे दर्शन घेण्यासाठी वर्षानुवर्षे न चुकता येतात. संकष्टीनिमित्ताने अनेकांनी अष्टविनायक देवस्थानच्या वारीसाठीही बेत आखल्याने आपसूकच पालीतील बल्लाळेश्‍वर मंदिरात गर्दी वाढल्याचे दिसून आले.

युवक, तरुण, महिला यांनी पायी दिंडीत उत्स्फूर्तपणे सहभाग घेतल्याचे दिसून आले. भजन, कीर्तन, गणेशवंदना व नृत्याचा ठेका धरत भाविक भक्तिमय वातावरणात तल्लीन झाल्याचे दिसून आले. मंगळवारी (ता. 28) येणाऱ्या माघी महोत्सवाची जय्यत तयारी देवस्थानने सुरू केली आहे. भाविकांनाही माघी गणेश महोत्सवाची ओढ लागल्याचे दिसते. उत्सवानिमित्ताने मंदिर परिसराचे सुशोभीकरणाचे काम युद्धपातळीवर सुरू आहे. त्यामुळे नेहमीच्या रांगामध्ये बदल करून हॉलमधून भाविकांना रांगेत दर्शन घेण्याची व्यवस्था केली होती.
 
पालीत दाखल झालेल्या भाविकांच्या गाड्यांमुळे काही प्रमाणात वाहतूक कोंडी झाली होती; परंतु पाली पोलिस व बल्लाळेश्‍वर देवस्थानचे सुरक्षा रक्षक वाहतूक कोंडी सोडविण्यासाठी प्रयत्न करत होते. पोलिस निरीक्षक बाळा कुंभार यांच्या मार्गदर्शनाखाली चोख पोलिस बंदोबस्त ठेवला होता.