माणगावः उन्हाळा सुरू झाला आणि काहिली वाढू लागली आहे. वाढणाऱ्या झळा जीव कासावीस करत असताना गारेगार पाण्याने तहान भागविण्यासाठी माणगावच्या बाजारपेठेत राजस्थानी माठांचे आगमन झाले आहे. लहान-मोठ्या आकारात उपलब्ध असणारे हे माठ 100 ते 150 रुपयांपर्यंत विकली जात आहेत. नळ लावलेले माठही उपलब्ध असून, 200 रुपयांपर्यंत विक्रीस उपलब्ध आहेत. सर्वसामान्यांच्या पसंतीस उतरणारे हे माठ फ्रीजमधील अतिथंड पाण्यापेक्षा नैसर्गिक व आरोग्यदायी आशा पाण्यासाठी माणगावकरांच्या पसंतीस उतरत आहेत.

भिवंडी पालिका ठेकेदारावर मेहरबान
 
आंध्र प्रदेशवरून आणले जाणारे हे माठ एका वेळेस इतक्‍या प्रमाणात एका गाडीत आणले जातात. स्थानिक मडक्‍यांनाही बाजारात चांगली मागणी असली तरी आधुनिक जीवनशैलीमुळे कुंभारकाम करणारे कारागीर दुर्मिळ झाल्याने परराज्यातील माठ खरेदी करण्याशिवाय नागरिकांना दुसरा कोणताच पर्याय उपलब्ध नाही. 
गेल्या वर्षीच्या तुलनेत या वर्षी 20 टक्के भाववाढ झाली आहे. गेल्या वर्षी लहान माठ 80 रुपयांपर्यंत मिळत होता, तर मोठे माठ 100 रुपयांपर्यंत उपलब्ध होते. या वर्षी मात्र बाजारातील भाववडीचा परिणाम, वाहतुकीचे वाढलेले दर यामुळे माठ महाग झाल्याचे विक्रेते सांगतात. नळ बसविलेल्या माठांना विशेष मागणी असून, साधारण 50 ते 60 रुपये जादाचे आकारून व्यावसायिक माठाला नळ बसवून देत आहेत. उन्हाळा वाढेल तसे माठाची विक्री वाढणार आहे. विशेष म्हणजे माठ विक्रीसाठी परप्रांतीय व्यापारी मोठ्या प्रमाणात दिसत असून, स्थानिक कुंभार व्यवसाय बंद होत असल्याने परप्रांतीय विक्रेते व माठ दिसत आहेत. 

उन्हाळा वाढल्याने माठ विक्री वाढली आहे. आंध्र प्रदेशवरून हे माठ आले आहेत. गेल्या वर्षीपेक्षा या वर्षी किमती वाढल्या आहेत. नळ असणाऱ्या माठाला चांगली मागणी आहे. 
- विजयकुमार, माठ विक्रेता, माणगाव