मुंबई - लोकलखाली कापला गेलेला हात पुन्हा जोडण्याची कामगिरी कूपर रुग्णालयातील डॉक्‍टरांनी केली आहे. कूपर रुग्णालयामध्ये तब्बल सात तासांच्या शस्त्रक्रियेनंतर रुग्णाचा तुटलेला उजवा हात पुन्हा एकदा दंडाशी जोडण्यात आला. 

गुजरातहून मुंबईत आलेला धर्मेंद्र (वय २८) अंधेरी स्थानकात उभ्या असलेल्या लोकलमधून खाली पडला. या अपघातात त्याचा उजवा हात लोकलच्या चाकाखाली आल्याने दंडापासून पूर्णपणे वेगळा झाला. रात्री ९ च्या सुमारास ही घटना घडल्यानंतर लोहमार्ग पोलिसांनी तातडीने धर्मेंद्रला तातडीने नजीकच्या कूपर रुग्णालयात दाखल केले. प्राथमिक तपासणीनंतर मध्यरात्री १ वाजता रुग्णालयातील डॉक्‍टरांनी धर्मेंद्रवर शस्त्रक्रिया करण्यास सुरुवात केली, ती सकाळी ८ वाजता संपली. सलग सात तासांच्या शस्त्रक्रियेनंतर धर्मेंद्रचा तुटलेला उजवा हात पुन्हा एकदा उजव्या दंडाशी जोडला गेला. 

शस्त्रक्रियेला महिना उलटल्यानंतर आता धर्मेंद्रच्या हाताच्या संवेदनांमध्ये सुधारणा दिसून येत आहे, अशी माहिती अधिष्ठाता डॉ. गणेश शिंदे यांनी दिली. कूपर रुग्णालयातील प्लास्टिक सर्जरी विभागाचे डॉ. नितीन घाग यांच्या नेतृत्वाखाली विभागातील डॉक्‍टरांनी ही शस्त्रक्रिया केली. वर्षभरात धर्मेंद्रचा हात पूर्ववत होईल, अशी माहिती डॉक्‍टरांनी दिली. 

धर्मेंद्रला वेळेवर रुग्णालयात दाखल करण्यात आले. त्यामुळेच त्याचा तुटलेला हात पुन्हा जोडणे शक्‍य झाले. हात-पाय यासारखा अवयव तुटला असल्यास त्या भागातील रक्तप्रवाह थांबतो आणि अवयव निकामी होण्याची प्रक्रिया त्वरित सुरू होते. हात दंडापासून कापला गेला असेल, तर चार तासांच्या आत रुग्णावर शस्त्रक्रिया करणे गरजेचे आहे. 
- डॉ. नितीन घाग, प्लास्टिक सर्जरी विभाग, कूपर रुग्णालय