मुंबई, ता.23: सीबीआयने पश्चिम रेल्वेत कार्यरत मुख्य कार्यालय अधीक्षकाला शुक्रवारी 50000 रुपयांची लाच स्विकारल्या प्रकरणी अटक केली आहे.

संजय वाघेला असे आरोपी रेल्वे अधिकाऱ्याचे नाव आहे.सीबीआयच्या माहितीनुसार गुरूवारी 22 फेब्रुवारी रोजी सीबीआयला वाघेला यांच्या विरोधात तक्रार प्राप्त झाली होती.

ज्यात वाशी येथील रहिवासी तक्रारदाराकडून 50000 रुपयांच्या लाचेची मागणी केल्याचा दावा केला होता.

या प्रकरणी तक्रारदार हा खाजगी कंपनीत लायझनिंग एजंट म्हणून कार्यरत आहे. संबंधित कंपनी पश्चिम रेल्वेला रेल्वेशी संबंधित विविध साहित्याचा पुरवठा करते आहे. ही कंपनी पश्चिम रेल्वेची नियमित साहित्य पुरवठा करणारी कंपनी आहे. पश्चिम रेल्वेला पुरवलेल्या साहित्याचा मोबदला मिळवण्यासाठी तक्रारदार त कंपनीच्या वतीने पश्चिम रेल्वेच्या लेखा विभागाकडे पाठपुरावा करत होता.

अलीकडेच, कंपनीने पश्चिम रेल्वेला साहित्याचा पुरवठा केला. तसेच पुरवलेल्या साहित्याची. 4.80 कोटी रुपयांची तीन बिले पश्चिम रेल्वेच्या लेखा विभागाकडे सादर केली.

वाघेला हे पश्चिम रेल्वे कार्यालयाच्या लेखा विभागात प्रक्रिया अधिकारी आहेत, मुंबई सेंट्रल येथील पश्चिम रेल्वेच्या कार्यालयात 15.

फेब्रुवारीला तक्रारदार वाघेला यांना भेटायला गेले होते. भेटी दरम्यान वाघेला यांनी बिल पास करण्यासाठी लाच मागितली. या संदर्भात तक्रारदार यांनी सीबीआयकडे लेखी तक्रार दिलीं.

यानंतर तक्रारीत नमूद केलेल्या आरोपाची शहानिशा करण्यात आली. आरोपांच्या शहानिशे नंतर लाच मागितल्याची पुष्टी झाली.

सीबीआयने सापळा रचून आरोपी अधिकाऱ्याला मुंबई येथील कार्यालयात 50 हजार रुपयांची लाच घेताना पकडले.

आरोपीशी संबंधित 2 ठिकाणी झडती घेण्यात आली, ज्यात कागदपत्रे दस्तावेज इत्यादी जप्त करण्यात आली.

अटक करण्यात आलेल्या आरोपीला शुक्रवारी न्यायालयाने पोलीस कोठडी सुनावली