अलिबाग, ता. २० ः सरत्या पावसाचा  आज ‘स्ट्राँग रूम’ला तडाखा बसला. त्यामुळे मतदान साहित्य पोहचविण्याची प्रक्रिया दोन तास उशिराने सुरू झाली. त्यामुळे सायंकाळपर्यंत मतदान केंद्राचा ताबा घेण्यासाठी कर्मचाऱ्यांना कसरत करावी लागत होती.

विधानसभा निवडणुकीसाठी कर्मचाऱ्यांना मतदान यंत्रे आणि अन्य साहित्य घेऊन सकाळी १०.३० वाजल्यापासून मतदान केंद्राकडे निघणे आवश्‍यक होते. जिल्हाधिकारी डॉ. विजय सूर्यवंशी यांनी याबाबतचे नियोजन केले होते. परंतु पावसामुळे आज ही प्रक्रिया दुपारी साडेबारा वाजल्यानंतर सुरू झाली. काही एसटी आगारातून वेळेवर आल्या नाहीत. त्यामुळे कर्मचाऱ्यांनाही वेळेवर  येण्यास उशीर झाला. तसेच स्ट्राँगरूममध्ये पावसामुळे चिखल झाला होता. त्याचा परिणाम निवडणूक प्रक्रिया सुरू होण्यास उशीर झाल्याचे अधिकाऱ्यांचे म्हणणे आहे. जिल्ह्यातील सातही मतदारसंघात ही प्रक्रिया उशिराने सुरू झाली. 

पावसामुळे कामात अडथळा येत असला, तरी मतदान साहित्य वेळेत पोहचविण्यासाठी जिल्हा प्रशासन प्रयत्न करीत आहे. सकाळी ७ वाजल्यापासून या प्रक्रियेचा पाठपुरावा घेतला जात आहे.

- वैशाली माने, उपजिल्हा निवडणूक निर्णय अधिकारी