मुंबई : फोन टॅपिंग प्रकरणात (Phone tapping case) पोलीस अधिकारी रश्मी शुक्ला (Rashmi shukla) यांना मुंबई पोलीस आरोपी करणार आहे का, असा सवाल मुंबई उच्च न्यायालयाने (mumbai high court) आज केला. मुंबई पोलिसांनी बेकायदेशीर फोन टॅपिंग आणि गोपनीय कागदपत्रे (hidden documents) लिक करणे यासंबंधी मार्चमध्ये फौजदारी गुन्हा दाखल (Police FIR) केला आहे. या प्रकरणात अटक होण्याच्या शक्यतेमुळे शुक्ला यांनी उच्च न्यायालयात याचिका (petition) केली आहे.

यावर आज न्या नितीन जामदार आणि न्या सारंग कोतवाल यांच्या खंडपीठापुढे सुनावणी झाली. आतापर्यंत पोलिसांनी केलेल्या तपासाचा अहवाल ता. 25 रोजी दाखल करण्याचे निर्देश न्यायालयाने पोलिसांना दिले. पोलिसांनी अद्याप शुक्ला यांना आरोपी केलेले नाही, मात्र सध्या तपास सुरू आहे असे प्रतिज्ञापत्रात पोलिसांनी म्हटले आहे. विशेष सरकारी वकील दरायस खंबाटा यांनी याची माहिती खंडपीठाला दिली. जर शुक्ला यांना आरोपी केले नसेल आणि त्यांना पोलीस आरोपी करणार नसतील तर याचिकेवर सुनावणी घेऊन वेळ घालवणार नाही, असे न्यायालयाने स्पष्ट केले. जेव्हा त्यांना आरोपी केले जाईल तेव्हा त्या पुन्हा न्यायालयात याचिका करु शकतात असेही न्यायालयाने सांगितले. याचिकेवर पुढील सुनावणी ता. 25 रोजी होणार आहे.

शुक्ला यांनी बेकायदेशीरपणे महत्त्वाचे फोन टॅप केले आणि यासंबंधी तयार केलेला गोपनीय अहवाल गैरप्रकारे उघड केला असा आरोप पोलिसांनी केला आहे. मात्र वरिष्ठांना विचारुन फोन टैप केले होते असा दावा शुक्ला यांनी केला आहे. हा तपास सीबीआयकडे सुपूर्द करावा आणि कठोर कारवाईपासून संरक्षण द्यावे अशी मागणी शुक्ला यांनी केली आहे.