शिंदे गटाचे आमदार रवींद्र वायकर यांना अखेर उत्तर पश्चिम मुंबईमधून शिवसेनेची उमेदवारी देण्यात आली आहे.

शिवसेना फुटल्यानंतर त्यांनी उद्धव ठाकरे यांच्याबरोबर राहण्याची पसंत केले होते. मात्र, काही दिवसांपूर्वीच त्यांनी मुख्यमंत्री एकनाथ शिंदे यांच्या नेतृत्त्वाखालील शिवसेनेत प्रवेश केला होता. त्यानंतर वायकर यांना आता थेट लोकसभेची लॉटरी लागली आहे.

आता उत्तर पश्चिम मुंबई मतदारसंघातून शिवसेनेकडून रवींद्र वायकरत तर उद्धव ठाकरे यांच्या नेतृत्त्वाखालील शिवसेनेकडून अमोल किर्तीकर एकमेकांसमोर उभे ठाकणार आहेत.

(MLA Ravindra Waikar has been nominated by Shiv Sena from North West Mumbai)

ठाकरेंना साथ अन् ईडी कारवाई

जुलै 2022 मध्ये मुख्यमंत्री एकनाथ शिंदे यांनी बंड केल्यानंतर जवळपास 40 आमदार उद्धव ठाकरेंना सोडून गेले होते. मात्र, ठाकरेंसोबत राहिलेल्यांमध्ये रविंद्र वायकरांचा समावेश होता.

उद्धव ठाकरे यांच्यासोबत असताना अंमलबजावणी संचालनालयाने (ED) आमदार रवींद्र वायकर यांच्यावर कारवाई केली होती. जोगेश्वरीतील बीएमसीच्या जमिनीवर एका आलिशान हॉटेलच्या कथित बांधकामाप्रकरणी ईडीने त्याच्याविरुद्ध गुन्हा दाखल केला होता.

काय आहे प्रकरण?

जानेवारी-जुलै 2021 मध्ये बीएमसीची दिशाभूल करून हॉटेल बांधण्यासाठी बेकायदेशीरपणे मंजुरी घेतल्याचा आरोप आमदार वायकर आणि इतरांवर असल्याची माहिती आहे.

जोगेश्वरी-विक्रोळी लिंक रोडवर असलेली ही जमीन क्रीडा आणि मनोरंजनासाठी राखीव होती, ती वायकर आणि इतरांना सार्वजनिक वापरासाठी देण्यात आली होती. मात्र, या सर्वांनी या जमिनीचा व्यावसायिक कारणासाठी वापर केला, असा आरोप आहे.

वायकरांची राजकीय कारकिर्द

65 वर्षीय रवींद्र वायकर दिवंगत बाळासाहेब ठाकरे यांच्या काळापासून शिवसेनेत सक्रीय आहेत. ते चार वेळा बीएमसीचे नगरसेवक आणि चार वेळा बीएमसीच्या स्थायी समितीचे अध्यक्ष राहिले आहेत.

देवेंद्र फडणवीस यांच्या नेतृत्वाखालील भाजप-शिवसेना युती सरकारमध्येही त्यांनी मंत्री म्हणूनही काम केले होते. मुंबईतील जोगेश्वरी पूर्व येथून तीन वेळा आमदार राहिले आहेते