पंजाब ऍण्ड महाराष्ट्र को-ऑपरेटिव्ह बॅंकेच्या (पीएमसी बॅंक) प्रकरणावर आमचे बारकाईने लक्ष असून "फोरेन्सिक ऑडिट'सुद्धा केले जात असल्याची माहिती रिझर्व्ह बॅंकेचे गव्हर्नर शक्तिकांत दास यांनी दिली. पीएमसी बॅंक ही देशातील आघाडीच्या दहा नागरी सहकारी बॅंकांपैकी एक आहे. या बॅंकेवर गेल्या 23 सप्टेंबर रोजी सहा महिन्यांच्या कालावधीसाठी रिझर्व्ह बॅंकेने प्रशासकाची नियुक्ती केली आहे. 

पीएमसी बॅंकेच्या परिस्थितीवर बारीक नजर ठेवून आहोत. शिवाय पीएमसी बॅंक प्रकरणात फॉरेन्सिक ऑडिट सुरू आहे, असे दास यांनी आर्थिक स्थिरता आणि विकास परिषदेच्या (एफएसडीसी) बैठकीनंतर पत्रकारांना सांगितले. 

पीएमसीने मोठ्या रकमेच्या विविध थकित कर्जांची माहिती बॅंकेने न दिल्यामुळे रिझर्व्ह बॅंकेने हे पाऊल उचलले आहे. रिझर्व्ह बॅंकेने या दरम्यान खातेधारकांना पैसे काढण्यावर मर्यादा घातल्या आहेत. पीएमसी बॅंकेने "एचडीआयएल'ला दिलेल्या कर्जातील 4,335 कोटी रुपयांना दुसरीकडेच वळते केल्याचा आरोप आहे. मंगळवारी रिझर्व्ह बॅंकेने खातेधारकांनी काढवयाच्या पैशाची मर्यादा 50 हजार रुपयांपर्यत वाढवली आहे. 

"एचडीआयएल'चे प्रवर्तक राकेश आणि सारंग वाधवान यांच्यासहीत पाच जणांना पोलिसांनी या प्रकरणात अटक केली आहे. पीएमसी बॅंकेच्या खातेधारकांनी मुंबईत अनेक ठिकाणी आतापर्यंत निदर्शने केली आहेत. रिझर्व्ह बॅंकेच्या मुख्यालयासमोरही निदर्शने करण्यात आली. हे प्रकरण उघडकीस आल्यापासून आतापर्यंत दहा खातेधारकांचा मृत्यू झाला आहे.

WebTitle :  RBI on PMC bank issue