Airplane News: देशातील सर्वात व्यस्त विमानतळांपैकी एक असलेल्या मुंबई विमानतळावर होत असलेली हवाईकोंडी ,विमानाच्या इंधनाचा होत असलेला अपव्यय यामुळे भारतीय विमान प्राधिकरणाने विमानांच्या संख्येत कपात करण्याचे निर्देश मुंबई विमानतळाला दिले होते.

यामुळे विस्तारा,अकासा,इंडिगो या आघाडीच्या विमान कंपन्यांनी विमानांच्या संख्येत कपात करण्याचा निर्णय घेतला आहे. यामुळे प्रवाशांची संख्या जास्त आणि विमानांची संख्या कमी होणार असून येत्या उन्हाळ्यात मागणी वाढल्याने विमान प्रवास किमान २५ टक्यांनी महागणार आहे.

 मुंबई विमानतळावर गर्दी वाढत आहे , धावपट्टीवर क्षमतेपेक्षा जास्त वाहतूक होत आहे. त्यामुळे विमानतळाच्या हवाई क्षेत्रात वाहतूक कोंडी होत असून विमानांना धावपट्टीवर उतरायला विलंब होतो .४० ते ६० मिनिटे शहरावरून घिरट्या घालाव्या लागतात. एखादे विमान दर तासाला सरासरी दोन हजार किलो इंधन वापरते असे गृहित धरता, एवढा कालावधी हवेत फेऱ्या मारल्यामुळे विमानाच्या इंधनाचा लक्षणीय अपव्यय होतो.

४० मिनिटे हवेत फेऱ्या मारण्यासाठी १.७ किलो लिटर (सुमारे १.८ लाख रुपये खर्च) तर ६० मिनिटे हवेत घिरट्या घालण्यासाठी जवळजवळ २.५ किलो लिटर (सुमारे २.६ लाख रुपये खर्च) इंधन वाया जाते. इंधनाच्या या वाढत्या खर्चाचा भार सरतेशेवटी ग्राहकांनाच उचलावा लागतो.त्यामुळे भारतीय विमानतळ प्राधिकरणाने मुंबई विमानतळाला विमानांची संख्या कमी करण्याच्या सूचना केल्या आहेत. 

प्राधिकरणाच्या निर्देशानंतर अनेक एअरलाइन्सनी बुधवारपासून विमानंच्या संख्येत कपात केली. आघाडीवर असलेल्या इंडिगो कंपनीने १५ फेब्रुवारीपासून काही विमान रद्द केली आहेत. अकासा एअरने मुंबई आणि बेंगळुरू दरम्यानची QP १३७४ (मुंबई ते बेंगळुरू) आणि QP १३६२ (बेंगळुरू ते मुंबई) उड्डाणे ३० मार्चपर्यंत रद्द केली आहेत. विस्ताराने १९ ते ३० फेब्रुवारी दरम्यान दररोज आठ उड्डाणे रद्द करण्याचा निर्णय घेतला आहे. यामुळे आठवड्याला सुमारे ४० विमान रद्द होणार आहेत.

तिकिटदरात वाढ

मार्ग--------------१९ फेब्रुवारी-----------------मे

मुंबई-दिल्ली-----५,५००रु-----------६,६००च्या पुढे

मुंबई-बेगळुरु-------४,२७१रु-----------४,५३५च्या पुढे

मुंबई-चैन्नई---------३,५००रु------------४,०००च्या पुढे

मुंबई-कोलकत्ता-------६,५००रु----------७,७३६च्या पुढे

मुंबई-श्रीनगर--------१०,३६६रु---------१२,३९७ च्या पुढे