डोंबिवली, ता. १ : दारूसाठी उधारी आणि त्यातून तीन लाखांच्या कर्जाचा डोंगर उभा राहिल्याने कामाच्याच ठिकाणी चोरी करण्याचा प्रकार उघडकीस आला आहे. याप्रकरणी रामनगर पोलिस ठाण्यात गुन्हा दाखल होताच पोलिसांनी आरोपीला २४ तासांच्या आत गोग्रासवाडी येथून अटक केली. विजय मनतोडे (वय २९) असे अटक केलेल्या आरोपीचे नाव आहे.

पोलिसांनी दिलेल्या माहितीनुसार विजय हा डोंबिवली पूर्वेतील गोग्रासवाडी परिसरात राहण्यास आहे. चिपळूणकर रोडवरील डॉमिनोज पिझ्झा या ठिकाणी तो कामास होता. दारूचे व्यसन असल्याने दारू पिण्यासाठी त्याने अनेकांकडून उधार पैसे घेतले होते.

उधारीचे पैसे परत करावेत, यासाठी त्याच्या दारात दररोज नागरिक उभे रहात असत. काम करत असलेल्या ठिकाणी दिवसाला मोठा गल्ला जमा होतो, हे त्याला समजले होते. त्यामुळे या ठिकाणीच हात साफ करण्याची त्याने योजना आखली होती.

गल्ल्याची बनावट चावी बनवली

काम करत असलेल्या डॉमिनोजमधील गल्ल्याची चावी घेऊन विजयने त्या पद्धतीची बनावट चावी तयार करून घेतली होती. कटावणीच्या सहायाने त्याने दुकानाचे शटर उघडले. दुकानात तिजोरी कोठे आहे हे त्याला माहीत होते.

त्यामुळे तो तडक पहिल्या मजल्यावर गेला. त्या ठिकाणी त्याने चोरी करण्याआधी तेथील सीसीटीव्हीची वायर काढल्याने तो कॅमेऱ्यात कैद झाला नाही. दुकानातील ८० हजाराची रक्कम चोरून तो पसार झाला होता