वादग्रस्त पोलीस अधिकारी सचिन वाझे यांना मुंबई पोलीस दलातून निलंबित करण्यात आले आहे. राष्ट्रीय तपास यंत्रणा एनआयने त्यांना मुकेश अंबानी यांच्या निवासस्थानाबाहेरील कारमधील स्फोटक प्रकरणात शनिवारी रात्री उशिरा अटक केली. या कारवाईनंतरच सचिन वाझेंचे पोलीस दलातून निलंबन होणार असे बोलले जात होते. अखेर आज सोमवारी सचिन वाझेंचे निलंबन करण्यात आले आहे. सचिन वाझेंचे दुसऱ्यांदा निलंबन झाले आहे. यापूर्वी २००३ मध्य ख्वाजा युनूस प्रकरणात सचिन वाझेंचे निलंबन झाले होते. 

 नियमानुसार कुठल्याही गुन्ह्यात सेवेतील अधिकाऱ्यावर अटकेची कारवाई झाल्यानंतर ही कारवाई केली जाते. कोणताही अधिकारी 48 तासांपेक्षा जास्त वेळ पोलीस कोठडीत असेल तर त्याचं निलंबन होतं. त्यामुळे आता सचिन वाझे यांच्यावर निलंबनाची कारवाई करण्यात करण्यात आलीय.  पोलीस दलाच्या प्रवक्त्याने याला दुजोरा दिला आहे.

एन्काऊंटर स्पेशलिस्ट म्हणून ओळखल्या जाणाऱ्या सचिन वाझेंवर सर्वात आधी ख्वाजा युनूस प्रकरणात निलंबनाची कारवाई करण्यात आली होती. त्यानंतर तब्बल 16 वर्षानंतर वाझे यांना पोलीस खात्यात दुसऱ्यांदा संधी मिळाली होती. पण आता स्फोटक प्रकरणातील सहभागामुळे पुन्हा त्यांच्यावर निलंबनाची कारवाई झाली आहे. 

राष्ट्रीय तपास यंत्रणेच्या कोर्टाने काल सहाय्यक पोलीस निरीक्षक सचिन वाझे यांना २५ मार्चपर्यंत कोठडी सुनावली आहे. ठाण्यातील उद्योजक मनसुख हिरेन मृत्यू प्रकरणातही सचिन वाझेंवर संशय आहे. एनआयए स्फोटक प्रकरणाचा तपास करतेय, तर एटीएसक मनसुख हिरेन मृत्यू प्रकरणाचा तपास करत आहे.