नवी मुंबई : मोबाईल फोन, लॅपटॉप व इतर इलेक्‍ट्रॉनिक्‍स वस्तूंच्या उत्पादनासाठी प्रसिद्ध असलेल्या ऍपल कंपनीच्या नावाने बनावट इलेक्‍ट्रॉनिक्‍स वस्तूंची विक्री करणाऱ्या वाशीतील चार दुकानांवर वाशी पोलिसांनी छापा टाकला. या वेळी सुमारे पावणेतीन लाख रुपये किमतीच्या बनावट इलेक्‍ट्रॉनिक्‍स वस्तू जप्त करण्यात करण्यात आल्या आहेत. वाशी पोलिसांनी याविरोधात बौद्धिक संपदा कायद्यानुसार गुन्हा दाखल केला आहे. 

पोलिस दल कोरोना मुक्तीच्या दिशेने?, लागण झालेल्या पोलिसांची संख्याही घटली

ऍपल कंपनीच्या मूळ उत्पादनासारख्या दिसणाऱ्या बनावट इलेक्‍ट्रॉनिक्‍स वस्तू खऱ्या ऍपल कंपनीच्या असल्याचे भासवून त्यांची बाजारात विक्री करणाऱ्यांवर कायदेशीर कारवाई करण्याचे हक्क अमेरिकेन ऍपल कंपनीने ग्रिफीन इंटॅलेक्‍चुअल प्रॉपर्टी सर्व्हिसेस प्रा.लि. या कंपनीला दिले आहेत. त्यानुसार कंपनीने वाशी पोलिसांच्या मदतीने गुरुवारी (ता. 29) सायंकाळी वाशी प्लाझा इमारतीतील रिअल ऍपल शॉप, श्री गणेश मोबाईल शॉप, मोबी वर्ल्ड आणि लॅपटॉप वर्ल्ड या चार दुकांनावर छापे मारून त्या ठिकाणी विक्रीसाठी ठेवण्यात आलेल्या वस्तूंची तपासणी केली. या वेळी या दुकानामध्ये मॅगसेफ पॉवर ऍडाफ्टर, मोबाईलचे बॅक कव्हर, लाईटनिंग केबल, यूएसबी पॉवर ऍडोफ्टर, इयर पॉड, आयपॉप मिनी, आयपॉड प्रो केस, लाईटनिंग टू यूएसबी केबल, आयफोन बॅक कव्हर, एअर पॉड प्रो व इतर वस्तू असा सुमारे पावणेतीन लाख रुपये किमतीच्या बनावट वस्तू आढळून आल्या. 

प्रेमाच्या जाळ्यात ओढून अश्लील व्हिडिओ अपलोड करणारा भामटा अटकेत

पावणेतीन लाखांच्या बनावट वस्तू जप्त 
ऍपलच्या कंपनीच्या नावाने बनावट वस्तूंची विक्री करणाऱ्या जयेश राजाजी गेहलोत (34), बिरजू बहादूर सहानी (36), धवल रमेशभाई पटेल (29) व वासिम नजमेआला अख्तर (23) या चारही दुकानदारांवर वाशी पोलिस ठाण्यात बौद्धिक संपदा कायद्यानुसार गुन्हा दाखल केला आहे. तसेच या चारही दुकानात आढळून आलेल्या बनावट वस्तू जप्त करून पुढील तपासाला सुरुवात केली आहे

----------------------------------------------------

( संपादन - तुषार सोनवणे )