राज्याच्या राजकारणात सध्या देवेंद्र फडणवीस विरूद्ध महाविकास आघाडी असं द्वंद्व रंगलेलं दिसत आहे. देवेंद्र फडणवीस यांनी राज्यातील पोलीस बदली प्रकरणाबाबत दिल्लीला गृहसचिवांची भेट घेतली. या मुद्द्यावर आज शिवसेना खासदार संजय राऊत यांनी नाराजी व्यक्त केली. "कोणत्याही राजकारणी माणसासाठी राजकीय भाग्य महत्त्वाचं असतं. लोक मुख्यमंत्री होतात पण फडणवील यांना त्यांचा पाच वर्षांचा कार्यकाळ पूर्ण करता आला. यासाठी राजकीय भाग्याची जोड असावी लागले. फडणवीस यांनी त्यांच्या काळात राज्याचं नेतृत्व उत्तम प्रकारे केल, पण त्यांच्या गाठीशी असलेला अनुभव त्यांनी आता विरोधी पक्षनेता म्हणूनही योग्य प्रकारे वापरला पाहिजे. विरोधी पक्षनेत्याने आक्रमक असावे पण राज्याच्या प्रतिष्ठेच्या मूळावर उठणारा आक्रमकपणा कोणत्याही राजकारणाच्या वर्तणुकीत असू नये", असे स्पष्ट मत संजय राऊत यांनी मांडले.

"सचिन वाझे अडचणी निर्माण करू शकतो हे आधीच सांगितलं होतं"

"प्रत्येक सरकारच्या काळात काही चुका होत असतात. पण त्या चुका सुधारण्याची संधी त्या सरकारला देण्यात आली पाहिजे. विरोधकांनी ती संधी दिली पाहिजे. प्रशासकीय अधिकाऱ्यांशी चांगले संबंध असणं हे चांगल्या विरोधी पक्षनेत्याचे लक्षण आहे. पण रश्मी शुक्ला प्रकरणात विरोधी पक्ष तोंडावर पडला. त्यांनी ही लढाई महाराष्ट्रातच ठेवायला हवी होती. महाराष्ट्राशी इमान राखायला हवं होते. मला अजूनही असं वाटतं की महाराष्ट्राच्या सीमा विरोधी पक्षाने ओलांडू नयेत. कारण महाराष्ट्र दिल्लीकडे आशेने पाहू लागला तर त्यामुळे सह्याद्रीचे शिखर ओशाळतं", असा भावनिक मुद्दा संजय राऊत यांनी मांडला.

अमित शाह यांना आम्हीही भेटू शकतो- संजय राऊत

महाविकास आघाडीला काहीही धोका नाही. आमची आघाडी ताकदीने काम करत आहे. राजकारण थोडं हालतंडुलतं असायला हवं. एकमेकांवर टीका-टिपण्णी व्हायलाच हवी. कारण भाजपच्या भाषेत ही लोकशाही आहे. प्रत्येकाने सत्य बोललं पाहिजे. विरोधकांना सध्या राज्य दिसत नाहीत. थेट दिल्ली दिसते. त्यामुळे त्यावर मी काही बोलणार नाही. विरोधकांना कोणताही रंग नाही. ते बेरंग आहेत. त्यांना रंग असता तर त्यांनी चांगले रंग उधळले असते. महाराष्ट्र सरकारच्या तंगड्यात तंगडं अडकवू नका. सरकार स्थिर आहे", असं ते म्हणाले.