मुंबई - भाजपने अशी कोणती फाईल दाखवली की ‘त्यांनी’ ‘यूटर्न’ घेतला, असा अप्रत्यक्ष टोला लगावत शिवसेना (उद्धव बाळासाहेब ठाकरे) पक्षाचे खासदार संजय राऊत यांनी मनसेचे अध्यक्ष राज ठाकरे यांच्यावर निशाणा साधला.

महाराष्ट्र नवनिर्माण सेना अचानक ‘नमोनिर्माणट’ पक्ष का झाला, असा सवालही करत मनसेने भाजपला बिनशर्त पाठिंबा देण्याच्या पक्षाचे अध्यक्ष राज ठाकरे यांच्या भूमिकेचा समाचार घेतला आहे.

अनेक नेते भाजपच्या दबावासमोर झुकले. मात्र आम्ही शरणागती पत्करणार नाही, आम्ही महाराष्ट्राच्या शत्रूशी लढतच राहणार, असा निर्धारही त्यांनी व्यक्त केला. मनसेचे अध्यक्ष राज ठाकरे यांनी ‘मोदी, शहा महाराष्ट्राचे शत्रू आहे, त्यांना या मातीत पाय ठेवायला देऊ नका’, असे आवाहन राज ठाकरे यांनी केले होते.

मात्र, आता त्यांना कोणता साक्षात्कार झाली की ते भूमिका बदलून भाजपला पाठिंबा देत आहेत, असा हल्लाबोल संजय राऊत यांनी केला. महाराष्ट्राचे शत्रू म्हणणाऱ्यांनाच ते पाठिंबा देत आहेत, आता ते जनतेला काय सांगणार आहेत, असा सवालही त्यांनी केला. अशी कोणती फाईल त्यांना दाखवली की त्यांनी यूटर्न घेतला, असा सवालही त्यांनी केला.

उपमुख्यमंत्री अजित पवार, हसन मुश्रीफ यांच्यासह अनेक नेते भाजपसोबत का गेले, कोणत्या तपास यंत्रणेच्या दबावाखाली गेले, हे सर्वांना माहिती आहे. त्यांच्या अनेक फायली उघडल्या गेल्या, त्यामुळे भाजपसमोर शरणागती पत्करून ते गेले. भाजपचा राजकीय व्यभिचार जगजाहीर असल्याचे वाभाडे त्यांनी काढले.

सरचिटणीसांचा राजीनामा

महाराष्ट्र नवनिर्माण सेनेचे (मनसे) प्रमुख राज ठाकरे यांनी लोकसभा निवडणुकीत पंतप्रधान नरेंद्र मोदी यांना बिनशर्त पाठिंबा जाहीर केल्यानंतर पक्षातील कार्यकर्ते गोंधळात पडले आहेत. मनसेचे सरचिटणीस कीर्तिकुमार शिंदे यांनी व्यथित होऊन पक्षाला ‘जय महाराष्ट्र’ करीत आपल्या पदाचा राजीनामा दिला आहे. त्यांनी फेसबुकवर सविस्तर पोस्ट लिहून खदखद व्यक्त केली आहे.