नवी मुंबई : सानपाडा परिसरातील एका बालरोगतज्ज्ञ डॉक्टरने (Doctor) राहत्या घरी गळफास घेऊन आत्महत्या (Suicide) केल्याची घटना उघडकीस आली आहे. डॉ. प्रेम किशनचंद पहुजा (वय ४८) असे या डॉक्टरचे नाव असून मानसिक तणावातून (Mentally sickness) त्यांनी आत्महत्या केल्याचा संशय व्यक्त करण्यात येत आहे. दरम्यान, आत्महत्येमागचे नेमके कारण अद्याप अस्पष्ट असल्याचे सानपाडा पोलिसांनी (sanpada police) सांगितले.

सानपाड्याच्या सेक्टर-१० मधील प्रियांका पॅलेस इमारतीतील रहिवासी असलेले डॉ. प्रेम पहुजा यांचा याच इमारतीच्या तळमजल्यावर लहान मुलांचा दवाखाना आहे. डॉ. पहुजा यांची पत्नीदेखील बालरोगतज्ज्ञ असून त्या कल्याण येथे राहतात. डॉ. पहुजा हे सध्या एकटेच राहत होते. मंगळवारी (ता. २१) दुपारी त्यांच्या दवाखान्यात रुग्ण आल्याने तेथील कर्मचाऱ्यांनी डॉक्टरांना संपर्क साधण्याचा प्रयत्न केला; मात्र त्यांच्याकडून कोणताही प्रतिसाद न मिळाल्याने कर्मचाऱ्यांनी सुरक्षारक्षकाला त्यांच्या घरी पाठवले होते. त्या वेळी डॉ. पहुजा यांनी रुग्णाला सध्या नर्सकडून तपासा. सायंकाळी मी दवाखान्यात येईल, असे सांगितले.

दरम्यान, सायंकाळी सात वाजतादेखील डॉक्टर दवाखान्यात न आल्याने त्यांना फोन करण्यात आले; मात्र फोन बंद असल्याने दवाखान्यातील कर्मचारी घरी गेले. घराचा दरवाजा अनेक वेळा ठोठावूनदेखील दरवाजा उघडत नसल्याने दरवाजा तोडला. त्या वेळी डॉ. पहुजा हे गॅलरीत गळफास घेतलेल्या स्थितीत आढळून आले. याबाबत सानपाडा पोलिसांना कळवताच त्यांनी घटनास्थळी येत पंचनामा केला आणि मृतदेह शवविच्छेदनासाठी रुग्णालयात पाठवला. प्राथमिक तपासानुसार, डॉ. पहुजा यांनी मानसिक तणावातून आत्महत्या केली असावी, अशी शक्यता व्यक्त करण्यात येत आहे.

अनेकांना धक्का

घटनास्थळी पोलिसांना कोणत्याही प्रकारची सुसाईड नोट सापडलेली नाही. त्यामुळे डॉ. पहुजा यांच्या आत्महत्येमागचे कारण स्पष्ट झाले नसल्याचे पोलिसांनी सांगितले. या प्रकरणी तपास सुरू असल्याचे पोलिसांनी सांगितले. नेहमी हसतमुख असलेले डॉ. प्रेम पहुजा हे नवी मुंबईतील प्रसिद्ध डॉक्टर होते. त्यांच्या निधनामुळे परिसरातील अनेकांना धक्का बसला आहे