मुंबई : विद्यार्थ्यांना शाळेत घेऊन गेलेली बस गायब झाल्याचा (Mumbai School Bus Not Reachable) धक्कादायक प्रकार समोर आला आहे. सांताक्रूझमधल्या पोदार स्कूलमध्ये (Potdar School Santa cruz) ही घटना घडली असून मुलांच्या सुरक्षेसाठी पालकांनी थेट शाळेत धाव घेतली होती. तसेच शाळा प्रशासनावर प्रश्न उपस्थित केले आहेत. दरम्यान, सर्व विद्यार्थी सुरक्षित आहेत, अशी माहिती मुंबई पोलिसांनी दिली आहे.

आज मुंबईतील पोदार स्कूलच्या विद्यार्थ्यांचा शाळेचा होता पहिला दिवस होता. त्यामुळे विद्यार्थी 6 वाजता शाळेत गेले. पण, साडेचारपर्यंत घरी पोहोचले नाहीत. त्यामुळे आपली मुलं कुठे आहेत? यासाठी पालकांनी शाळेत धाव घेतली. शाळेच्या म्हणण्यानुसार शाळा साडेबारा वाजता सुटली. त्यानंतर शाळेची बस विद्यार्थ्यांना घेऊन गेली. तरीही विद्यार्थी साडेचारपर्यंत घरी पोहोचले नव्हते, असा आरोप पालकांनी केला आहे. मग, साडेबारा ते साडेचार वाजेपर्यंत विद्यार्थ्यांना घेऊन बस कुठं गायब होती? असा सवाल पालकांनी उपस्थित केला आहे. त्यानंतर सांताक्रूझ पोलिस ठाण्यात तक्रार दाखल केली असून पोलिस पोदार स्कूलमध्ये पोहोचले आणि चौकशी केली.

चार तास गायब असल्याचा आरोप करत पालकांनी शाळेत गोंधळ घातला. शाळा प्रशासनावर पालकांनी आरोप केले आहेत. पण, बस दोन तास उशिरा पोहोचल्याची माहिती पोलिसांनी दिली आहे.

सर्व विद्यार्थी सुरक्षित -

सांताक्रूझमधील विद्यार्थ्यांना घेऊन गायब झालेली बस सापडली असून सर्व विद्यार्थी सुरक्षित आहेत. विद्यार्थी दोन तास उशिरा घरी पोहोचले होते. काही तांत्रिक कारणांमुळे विद्यार्थी उशिरा पोहोचले. आता सर्व मुलं आपआपल्या घरी आहेत. कोणीही घाबरून जाऊ नये. शाळा त्या कंत्राटदारावर योग्य ती कारवाई करणार आहे. चालकाला रस्ते माहिती नसल्यानं ही घटना घडली आहे, असं मुंबई पोलिस सहआयुक्त विश्वास नांगरे पाटलांनी एबीपी माझासोबत सांगितले.