मुंबई : प्रसिद्ध अभिनेते सयाजी शिंदे यांनी अजित पवार यांच्या उपस्थितीत राष्ट्रवादी काँग्रेसमध्ये प्रवेश केला. यावेळी त्यांनी आपण राजकारणात का आलो? याचं कारण सांगितलं. तसंच अभिनेता म्हणून आपण आजवर नेत्यांच्या अनेक भूमिका साकारल्याचं त्यांनी सांगितलं.

पक्ष प्रवेशानंतर पत्रकार परिषदेत आपली भूमिका मांडताना अभिनेत्यावरुन आता नेते बनलेले सयाजी शिंदे म्हणाले, अजून मी नेता पुढारी झालो नाही त्यामुळं मला प्रोटोकॅाल माहिती नाही. मी अनेक नेत्यांच्या भूमिका केल्या आहेत. पण राजकारणात येईल असा कधी विचार केला नव्हता. मंत्रालयात मी २५ वेळा गेलो तर १५ वेळा दादांनाच भेटलोय. मागच्या ८ दिवसांत माझा राष्ट्रवादीत प्रवेशाबबात निर्णय झाला.

काही विषय हे सिस्टममध्ये राहून लवकर मार्गी लावता येतील. सिस्टममधून काम झालं तर मोठ्या संख्येनं झाड लागतील. या पक्षाचं नियोजन आणि काम मला आवडतं. शेतकऱ्यांच्या योजनांसंदर्भात पक्ष चांगला निर्णय घेत, असं मला वाटलं. आता काही हटत नाही जे व्हायचं ते होऊन जाऊ दे. अजितदादांकडून मी राजकारणाचे धडे घेईन. माझ्या डोक्यात जी कामं आहेत ती पुढच्या ५ वर्षात करण्याचा विचार आहे. मला काही हवय असं नाही, माझ्याकडं सगळं आहे. पण मला पर्यावरणासंदर्भात काम करायचं आहे.