नालासोपारा : शाळेमार्फत आयोजित केलेल्या सहलीत जाणाऱ्या आपल्या भावाला सोडण्यासाठी आलेल्या बहिणीच्या शाळेच्या बसला अपघात झाल्याची दुर्दैवी घटना आज मंगळवार ता. 30 रोजी सकाळी 7 वाजता विरार मध्ये घडली आहे.

या अपघातात बहिणीचा दुर्दैवी मृत्यू झाला आहे. या घटनेने शाळा आणि परिसरात दुःखाचा डोंगर कोसळला असून, शाळेने सहलही रद्द केली आहे. सिद्धी फुटाणे ( वय 19) असे अपघातात मयत झालेल्या बहिणीचे नाव असून, ही 5 वित शिकणाऱ्या भावाला घेऊन सहलीसाठी शाळेत घेऊन आली होती.

विरार पूर्वेच्या गोपचरपाडा परिसरात नरसिंह गोविंद वर्तक ( एन जी व्ही) ही शाळा आहे. या शाळेच्या विद्यार्थ्यांची सहल आज मुंबईत जाणार होती. त्यामुळे सिद्धी ही आपल्या भावाला घेऊन शाळेत आली होती.

सर्व मुले बसमध्ये बसली आणि पालक आपल्या मुलांना निरोप देण्यासाठी उभे होते. यावेळी शाळेच्या बस चालकाने बस मागे घेत असताना, ती बस बाजूच्या भिंतीला आदळली. यावेळी पाठीमागे उभी असलेल्या सिद्धीलाही त्याचा धक्का लागला आणि बसच्या धडकेत भिंत ही तिच्या अंगावर कोसळल्याने ती गंभीर जखमी झाली होती.

जखमी अवस्थेत तिला विरारच्या संजीवनी रुग्णालयात दाखल केले असता तेथे उपचारादरम्यान तिचा मृत्यू झाला. सिद्धी फुटाणे या तरुणीचे वडील मुंबई पोलीस दलात आहेत. या घटनेमुळे शाळेवर शोककळा पसरली आहे. सहल रद्द करण्यात आली असून विरार पोलीस ठाण्यात बस चालकावर गुन्हा दाखल केला आहे.